پارتی و یەكێتی كۆبوونەوە و لەبارەی ڕەشنووسی نێوانیانەوە گەیشتنە خاڵی كۆتایی

ئاڤا نیوز

 

شاندی دانووستاندنكاری پارتی دیموكراتی كوردستان و یەكێتیی نیشتمانیی كوردستان لە بارەگای مەكتەبی سیاسیی یەكێتی لە هەولێر كۆبوونەوە و نووسینگەی قوباد تاڵەبانی کۆبوونەوەکە بە "ئەرێنی" ناو دەبات.

 

وێنە گەورەكە: پارتی و یەكێتی وەك یەكەم و دووەمی  دوایین هەڵبژاردنی پەرلەمانی كوردستان لە كۆبوونەوەكانیان بۆ پێكهێنانی كابینەی دەی حكومەتی هەرێمی كوردستان بە سەرۆكایەتیی سەرۆكوەزیران مەسرور بارزانی بەردەوامە و جگە لە شاندی دانوستاندنكاری هەردوولا، دوو كۆبوونەوەی لوتكەش لەنێوان سەرۆكوەزیران مەسرور بارزانی و بافڵ تاڵەبانیش كراوە و بەپێی گوتەی بەرپرسانی هەردوولا؛ پێكهێنانی كابینەكە نزیكە.

 

زانیاریی پەیامنێر: كوردستان حەسەن، پەیامنێری دیپلۆماسیی ئاڤا میدیا ڕایگەیاند: ئەنجامی كۆبوونەوەكە زۆر ئەرێنی بووە و گفتوگۆ سەبارەت بە كردنەوەی ئەو گرێكوێرانە كراون كە تاوەكوو ئێستا لەنێوان شاندی پارتی و یەكێتی نەكراوەتەوە، شاندی دانوستاندنكاری هەردوولا پێش بەربانگ و دوای بەربانگیش لەسەر سفرە و لەكاتی نانخواردن گفتوگۆی وردیان كردووە، بەپێی گوتەی بەرپرسە بەشداربووەكان، پێكهێنانی كابینەی دەی حكومەت هێندەی نەماوە.

 

زانیاریی تایبەت: ئاڤا میدیا زانیویەتی، ڕەشنووسی نێوان پارتی و یەكێتی %90ی تەواو بووە و تەنیا %10 ماوە، دوای كۆبوونەوەكەی سەرۆكوەزیران مەسرور بارزانی و بافڵ تاڵەبانی ئەمڕۆ شاندی دانوستاندنكاری هەردوولا زیاتر بەرچاویان ڕوون بووە و گەیشتوونەتە بڕیاری كۆتایی سەبارەت بە پەسەندكردنی %100ی ڕەشنووسەكە لەمەودوا گفتوگۆ سەبارەت بە دابەشكردنی پۆستی سەرۆكایەتییەكان و وەزارەتە سیادی و خزمەتگوزارییەكان دەستپێدەكات.

 

ڕاگەیێنراوی فەرمی: لای خۆیەوە نووسینگەی قوباد تاڵەبانی ڕایگەیاند: هەردوو شاندی باڵای دانووستاندنکاری پارتی دیموکراتی کوردستان و یەکێتیی نیشتمانیی کوردستان ئەمڕۆ لە بارەگای مەکتەبی سیاسی یەکێتی لە هەولێر کۆبوونەوەیەکی ئەرێنییان ئەنجام دا، لە کۆبوونەوەکەدا؛ گەیشتنە دواڕەشنووسی دیدگای هاوبەش بۆ قۆناغی داهاتوو کە دەبێتە ئامرازێک بۆ پێکهێنانی حکومەت و دامەزراوەکانی تر و باشتر خزمەتکردنی هاووڵاتیان.