سەرفیترەی دانیشتووانی هەرێمی کوردستان نزیکەی 15 ملیار دینار دەبێت

ئاڤا نیوز

بەپێی خەمڵاندنی یەكێتیی زانایانی ئایینی ئیسلامیی كوردستان ئەمساڵ نزیكەی 15 ملیار دینار سەرفیترە و فیدیەی موسڵمانانی هەرێمی كوردستانە و لە ڕووی ئایینی ئیسلامەوە ئەرکە لەسەریان بیدەن.

وێنە گەورەکە: یەكێتیی زانایان بە لەبەرچاوگرتنی دواین سەرژمێری، ئاماژەی بە ئەوە داوە لە كۆی سەرجەم دانیشتووانی هەرێمی كوردستان كە 6 ملیۆن 500 هەزار کەسە 95%ی موسڵمانن، بەمەش بەلای كەم چوار ملیۆن و 500 هەزار كەس دەبێت سەرفیترە بدات بۆ هەر كەسێك سێ هەزار دینارە كە دەگاتە نزیكەی 15 ملیار ئەمە سەڕەڕای ئەوانەی بەهۆی ڕۆژوو نەگرتنەوە دەبێت فدییە بدەن.

لێدوانی فەرمی: د. عەبدوڵڵا شێركاوەیی، وتەبێژی یەکێتی زانایانی ئایینی ئیسلامی کوردستان گلەیی لە شێوازی دابەشكردنی ئەو بڕە زۆرەی پارە هەیە و دەڵێ: جگە لەو 15 ملیارە سەدان ملیار دینار پارەی زەكات هەیە و دەبێت پارەدار و دەوڵەمەندەكان بیدەن بە كەسانی هەژار، کەچی لە ئاست ئەو بڕە پارە زەبەلاحە، کەمتر هەست بە گۆڕانکاری دۆخی هەژاران دەکرێت، ئەگەرنا دەبوو هەر ساڵە و ڕێژەیەکی باش لە خەڵکی هەژار و کەمدەرامەت لە دۆخی هەژاری ڕزگاریان بووایە.