وەزیری دارایی: نابێت لە هیچ بانکێک دەستکاری پارەی هاووڵاتییان بكرێت

ئاڤا نیوز

 

ئەمڕۆ سێشەممە وەزیری دارایی و ئابووریی حكومەتی هەرێمی كوردستان لەگەڵ بەڕێوەبەری بانکەکان و گەنجینەکانی سنووری پارێزگای سلێمانی و هەڵەبجە و ئیدارەی گەرمیان و ڕاپەڕین کۆبووەوە و چەند بڕیارێک دران.  

 

ڕاگەیێنراوی فەرمی: بەپێی ناوەڕۆكی ڕاگەیێنراوێكی وەزارەتی دارایی، لە كۆبوونەوەكەدا ئەم بڕیارانەی خوارەوە دران.

 

- نابێت لە هیچ بانکێک کێشە و گرفت بۆ هاووڵاتییان و فەرمانگەکان و بەڵێندەران دروست بکرێت، بەپێچەوانەوە هەر کێشەیەکی نەخوازراو بەدەر لە یاسا و ڕێنماییەکان دروست بکرێت، ڕێوشوێنی پێویست لەگەڵ بەڕێوەبەری بانکەکان دەکرێت.

 

- نابێت لە هیچ بانکێک دەستکاری پارەی هاووڵاتییان (ئەمانات، وەدائیع، توفیر ،هتد...) بکرێت بەپێچەوانەوە ڕووبەڕووی لێپرسینەوەی یاسایی دەبنەوە. 
                                       
- بەهیچ جۆرێک نابێت لە ژێر هیچ بیانوویەکدا پارەی تەرخانکراو بۆ مووچە بۆ هیچ بوارێکی تر بەکاربهێنرێت.

 

- لە حاڵەتی دووبارەبوونەوەی سەرپێچیەکان، هەر کەس و لایەنێک پێچەوانەی ئەم ڕێنماییانە جوڵایەوە، پێویستە فەرمانبەران و مووچەخۆران و بەڵێندەران ڕاستەوخۆ وەزارەتی دارایی ئاگادار بکەنەوە تا ڕێکكاری پێویست بگیرێتە بەر.   

 

ئەوەی پێویستە بیزانیت: لە كۆبوونەوەكەدا وەزیری دارایی و ئابووری ئاماژەی بەوە داوە كە لە نزیکەوە چاودێری بەڕێوەچوونی کاروباری بانکەکان و جێبەجێکردنی بڕیارەکان دەكات و کەمتەرخەمی و چاوپۆشی لە هیچ بانکێک قبووڵ ناكرێت.