ئەمریکا و ئۆکراینا لەبارەی ئاگربەست لە سعوودیە کۆدەبنەوە

 

ئاڤا نیوز

بە گوتەی نوێنەری تایبەتی دۆناڵد ترەمپ بۆ ڕۆژهەڵاتی ناوەڕاست، دانوستانەکانی ئەمجارە بە ئامانجی ڕاگەیاندنی ئاگربەست لە نێوان ڕووسیا و ئۆکراینا ڕۆژی یەکشەممە لە شاری جەددەی سعوودیە دەستپێدەکەنەوە.

چیرۆکی سەرەکی: هەوڵەکان بۆ کۆتاییهێنان بە شەڕی نێوان ڕووسیا و ئۆکراینا لە لایەن ئەمریکاوە بەردەوامە، تا ئێستا ئۆکراینا ڕازی بووە بە ئاگربەست، بەلام ڕووسیا تا ئێستا بە فەرمی ڕاینەگەیاندووە کە ڕازی دەبێت یان نا،

لێدوانی فەرمی: لە میانی چاوپێکەوتنێکیدا لەگەڵ کەناڵی فۆکس نیوزی ئەمریکی، ستیڤ ویتکۆف، نوێنەری تایبەتی دۆناڵد ترەمپ بۆ ڕۆژهەڵاتی ناوەڕاست ڕایگەیاند، ڕۆژی یەکشەممە لە شاری جەددەی سعوودیە گفتوگۆکانی ئەمریکا لەگەڵ ئۆکراینا بۆ ڕاگرتنی جەنگ دەستپێدەکاتەوە و شاندەکەی ئەمریکا بە سەرۆکایەتی مارکۆ ڕوبیۆ وەزیری دەرەوە و مایک والتز ڕاوێژکاری ئاسایشی نیشتمانی ئەمریکا دەبێت.

ئەوەی پێویستە بیزانیت: ڕۆژی سێشەممە 2025-03-18، پوتن و ترەمپ لە میانی پەیوەندییەکی تەلەفۆنیدا کە ماوەی 90 خولەکی خایاند، لەسەر ئاگربەستێکی سنووردار لە ئۆکراینا ڕێککەوتن.

لە لایەکی دیکەوە: ڤۆلۆدیمێر زێلێنسکی، سەرۆکی ئۆکراینا ڕایگەیاند، پشتیوانی لە ئاگربەست بۆ ماوەی 30 ڕۆژ لەگەڵ ڕووسیا دووپاتدەکاتەوە، بەڵام جەختی لەسەر پێویستی وەرگرتنی وردەکاری لەسەر چۆنێتی جێبەجێکردنی ئاگربەستی لە واشنتن کردەوە و پوتنی تۆمەتبار کرد بەوەی کە هەوڵی لاوازکردنی ئۆکراینا دەدات.