ترەمپ پێشوازی لە تەحنوون بن زاید دەکات

ئاڤا نیوز

 

سەرۆکی ئەمریکا لە کۆشکی سپی پێشوازیی لە جێگری فەرمانڕەوای میرنشینی ئەبوزەبی و ڕاوێژکاری ئاسایشی نەتەوەیی ئیمارات کرد، ئەم سەردانەش لەنێوخۆ و دەرەوەدا کاردانەوەی بەدوای خۆیدا هێنا.

 

ئەوەی پێویستە بیزانیت: ئیمارات ڕۆڵی نێوەندگیر لەنێوان ئەمریکا و ئێران دەبینێت، بۆ ئەو مەبەستەش ڕۆژی 12ـی ئازار لەلایەن ئەنوەر گەرگەش، دیپلۆماتکاری باڵای ئیمارات نامەیەکی دۆناڵد ترەمپ، سەرۆکی ئەمریکا گەیێنرایە ئایەتوڵلا خامنەیی، ڕێبەری باڵای کۆماری ئیسلامیی ئێران.

 

چیرۆکی سەرەکی: سێشەممە 2025-3-18، دۆناڵد ترەمپ، سەرۆکی ئەمریکا لە کۆشکی سپی پێشوازیی لە شێخ تەحنوون بن زاید ئال نهیان، جێگری فەرمانڕەوای میرنشینی ئەبوزەبی و ڕاوێژکاری ئاسایشی نەتەوەیی ئیمارات کرد.

 

بڵاوکراوەی فەرمی: شێخ تەحنوون وێنەیەکی کۆبوونەوەکەی لە لاپەڕەی ئێکسی خۆی بڵاو کردووەتەوە و نووسیویەتی: "سڵاوی شێخ محەمەد بن زاید ئال نهیانم گەیاندە دۆناڵد ترەمپ، فەخامەتی سەرۆکی ئەمریکا، لە ئێوارەخوانێکدا کە لە کۆشکی سپی بە ئامادەبوونی بەرپرسانی باڵای ئەمریکا و ئیمارات بەڕێوەچوو".

 

زانیاریی زیاتر: "لە گفتوگۆکانماندا تیشک خرایە سەر داهاتووی هاوبەشی ستراتیژیی درێژخایەنی نێوان هەردوو وڵاتی دۆست و پەرەپێدانی دیدگای هاوبەشمان بۆ خۆشگوزەرانی و پێشکەوتن".

 

لەلایەکی دیکە: ئەنوەر گەرگەش، ڕاوێژکاری سەرۆکی ئیمارات بۆ کاروباری دیپلۆماسی لە لاپەڕەی ئێکسی خۆیدا لەبارەی سەردانەکەی شێخ تەحنوون نووسیویەتی: "سەردانەکەی شێخ تەحنوون بن زاید بۆ ئەمریکا لە چوارچێوەی پەیوەندییە ستراتیژییە ناوازە و گەشەسەندووەکان لە هەموو ئاستەکاندا دێت کە پێکەوە کاردەکەن بۆ پشتیوانیکردن لە ئاسایش و خۆشگوزەرانی ناوچەکە و لە چوارچێوەی ڕوانگەیەکی ئایندەخواز کە هاوکاری ئابووری و وەبەرهێنان و تەکنەلۆژیا لەخۆ دەگرێت."