دەم پارتی داوای ئازادکردنی سەرۆکی گەورە شارەوانی ئیستەنبووڵ دەکات

ئاڤا نیوز

 

دوای ڕووداوەکانی بەرەبەیانی ئەمڕۆی ئیستەنبووڵ، دەم پارتی هاتوونەتە سەرخەت و داوای ئازادکردنی ئەکرەم ئیمامئۆغلو، سەرۆکی گەورە شارەوانی ئیستەنبووڵ دەکات.

 

چیرۆکی سەرەکی: بەرەبەیانی ئەمڕۆ دوای پارشێو، ئەکرەم ئیمامئۆغلو، سەرۆکی گەورە شارەوانی ئیستەنبووڵ بە تۆمەتی گەندەڵیکردن و پشتیوانیکردن لە تیرۆر دەستگیرکرا، لە گەڵیشیدا 106 کەسی دیکە کە سەرۆک شارەوانیی شیشلی و چەند هونەرمەندێک و ئەندامانی جەهەپەی تێدایە، دەستبەسەرکران.

 

ڕاگەیێنراوی فەرمی: دەم پارتی لە کاردانەوەی دەستگیرکردنی ئیمامئۆغلودا لە ڕاگەیێنراوێکی فەرمیدا دەڵێت: "وەک پێشتر چەندین جار ئاماژەمان پێدا، هەموو ئەم ڕێکارانە دەچنە چوارچێوەی کودەتاوە، هیوای گەل بۆ دیموکراسی لەناودەبات، تورکیا "دەسەڵاتی دادوەری و حکومەت بە هاوبەشی بەرهەمهێنراو" بەکاردەهێنێت کە هەموو ئۆپۆزسیۆنێکی سیاسی و کۆمەڵایەتی دەکاتە ئامانج و، تا دێت ئەم پرۆسەیە بەرفروانتر دەبێت".

 

زانیاریی زیاتر: دەم پارتی لە بەشێکی دیکەی ڕاگەیێنراوەکەیدا پەیامێک بۆ دەسەڵاتی تورکیا دەنێرێت و دەڵێت: "دەستبەجێ دەستبەرداری ئەم کارانەبن، واز لە بە ئامرازکردنی دەسەڵاتی دادوەری بێنن، دەستبەجێ ئەو کەسانەی ئەمڕۆ دەستگیرکراون ئازاد بکەن، بەتایبەتی ئەکرەم ئیمامئۆغڵو، سەرۆکی گەورە شارەوانی ئیستەنبووڵ".

 

لەلایەکی دیکەوە: دەم پارتی هەڵوەشاندنەوەی بڕوانامەی ئیمامئۆغلو، سەرۆکی گەورە شارەوانی ئیستەنبووڵ بە "پەڵەیەکی ڕەشی دیموکراسی تورکیا" ناودەبات.