دوای جەژن یەکێتی و پارتی بۆ دابەشکردنی پۆستەکان کۆدەبنەوە

 

ئاڤا نیوز

پارتی دیموکراتی کوردستان و یەکێتی نیشتمانی کوردستان، گەیشتنە دوایین قۆناغی ڕێککەوتن لەسەر ڕەشنووسی پێکهێنانی کابینەی نوێی حکومەت، بەپێی زانیارییەکانی ئاڤا میدیاش دوای جەژن بۆ دابەشکردنی پۆستەکان کۆدەبنەوە.

چیرۆکی سەرەکی: ئێوارەی دوێنێ لە دوایین کۆبوونەوەیاندا، شاندی دانووستانکاری پارتی و یەکێتی گەیشتنە ڕێککەوتنی کۆتایی لەسەر شێوازی بەرێوەبردنی حکومەتی داهاتووی هەرێمی کوردستان و هەموو ئەو گڕێیانەی مابوو لە نێوانیان کرانەوە.

ڕاگەیێنراوی فەرمی: دوای کۆبوونەوەکە لە ڕاگەیێنراوێکی هاوبەشدا ڕایانگەیاند، "کۆبوونەوەیەکی ئەرێنیمان ئەنجامدا، گەیشتینە دوا ڕەشنووسی دیدگای هاوبەش بۆ قۆناغی داهاتوو، کە دەبێتە ئامرازێک بۆ پێکهێنانی حکومەت و دامەزراوەکانی تر و باشتر خزمەتکردنی هاووڵاتییان".

زانیاری تایبەت: لێرە بەدوا قۆناغێکی دیکە لەنێوان پارتی و یەکێتی دەستپێدەکات، قۆناغی دابەشکردنی پشک و پۆستەکان، بۆ ئەمەش ڕێککەوتن لەنێوانیاندا هەیە، دوای جەژنی ڕەمەزان جارێکی دیکە کۆدەبنەوە و گفتوگۆی ئەمجارەیان بۆ یەکلاکردنەوەی دابەشکردنی پۆستەکانە.

ئەوەی تاوەکو ئێستا لەنێوان یەکێتی و پارتی یەکلابووەتەوە ئەمانەن:

٠ سەرۆکی هەرێمی کوردستان بۆ پارتی و جێگرەکەی بۆ یەکێتی.

٠ پۆستی سەرۆکی حکومەتی هەرێمی کوردستان بۆ پارتی و جێگرەکەی بۆ یەکێتی.

٠ سەرۆکی پەرلەمانی کوردستان بۆ یەکێتی و جێگرەکەی بۆ پارتی.

٠ سەرۆککۆماری عێراق بۆ یەکێتی و پەرلەمانتارانی پارتی و یەکێتی پێکەوە دەنگی پێدەدەن، جێگری سەرۆکی پەرلەمانی عێراق و وەزیرە سیادییەکەی پشکی کورد لە بەغدا بۆ پارتی دەبێت.

٠ لەنێو وەزارەتەکانی کابینەی نوێی حکومەتی هەرێمی کوردستانیش، یەکێتی چاوی لە چەند وەزارەتێکی سیادییە، لە سەرووی هەمووشیان وەزارەتەکانی ناوخۆ و سامانە سروشتییەکان و تەندروستی، ئەمەش تەوەری سەرەکی گفتوگۆی کۆبوونەوەی داهاتووی نێوان ئەم دوو حیزبە دەبێت.

لێدوانی فەرمی: ئەوەی لەسەر زاری بەرپرسانی باڵای هەردوو حیزب دەگوترێت، پێکهێنانی کابینەی نوێ زۆری نەماوە، بەگوتەی سەرچاوەیەکی باڵای نێو سەرکردایەتی یەکێتیش، "پلان وایە لە سەرەتای مانگی چوار دەستەی سەرۆکایەتی پەرلەمانی کوردستان هەڵبژێردرێت و دواتریش قۆناغەکانی دیکە دەستپێدەکات".

باکگراوند: پارتی دیموکراتی کوردستان و یەکێتی نیشتمانی کوردستان، براوەی یەکەم و دووەمی هەڵبژاردنەکانی خولی شەشەمی پەرلەمانی کوردستانن، بە هەردووکیان 62 کورسی پەرلەمانیان هەیە و پێکەوە دەتوانن کابینەی نوێی حکومەت پێکبهێنن.