دوای جەژنی ڕەمەزان زیاتر لە 9 هەزار یەکەی نیشتەجێبوون بەسەر هەژاران دابەش دەکرێت

ئاڤا نیوز

 

بڕیارە لە ماوەیەکی نزیکدا وەزارەتی ئاوەدانکردنەوە و نیشتەجێکردنی حکومەتی هەرێمی کوردستان تیروپشک بۆ زیاتر لە نۆ هەزار یەکەی نیشتەجێبوون بۆ خەڵکی کەمدەرامەت و هەژاران بکات، پرۆسەکە فەرمانبەرانیش دەگرێتەوە.

 

چیرۆکی سەرەکی: لە کابینەی نۆیەمی حکومەتی هەرێمی کوردستان لەسەر ڕاسپاردەی سەرۆکوەزیران مەسرور بارزانی بڕیاردرا بە دروستکردنی 20 هەزار یەکەی نیشتەجێبوون بۆ خەڵکی هەژار و کەمدەرامەت، بەشێکیان تەواو کراون و بڕیارە دوای جەژن تیروپشکیان بۆ بکرێت و دابەشبکرێن.

 

لێدوانی فەرمی: توانا بەشیر، بەڕێوەبەری گشتیی لە وەزارەتی ئاوەدانکردنەوەی حکومەتی ھەرێمی کوردستان بە ئاڤا میدیای ڕاگەیاند، کارکردن لە یەکەی نیشتەجێبوونی هەژاران و کەمدەرامەتان بەردەوامە و بەشێکیان تەواو کراوە، بڕیارە لەدوای جەژنی ڕەمەزان زیاتر لە نۆ هەزار یەکەی نیشتەجێبوون دابەشبکرێت، داوامان لە پارێزگا و شارەکان و ئیدارە سەربەخۆکان کردووە زانیاریمان بۆ ڕەوانە بکەن، بۆ ئەوەی دەست بە تیروپشک بکرێت.

زانیاریی زیاتر: بەشێک لەو کەسانەی فۆرمی یەکەی نیشتەجێبوونیان پڕکردۆتەوە و ناویان دەرچووە، فەرمانبەران سەرپشک دەبێت لەوەی زەوی وەربگرێت یاخود یەکەی نیشتەجێبوون، بۆیە پێویستە تەنیا یەکێک لەو دووانە وەربگرێت، چونکە وەکو سوومەند هەژمار دەکرێت.

 

ئەمەش بزانە: سەرەرای ئەوەی بەشێک لە یەکە نیشتەجێبوونەکان تەواو نەکراوە، بەڵام ئێمە مەبەستمانە دەست بە دابەشکردنی بکەین، بۆ ئەوەی خەڵک بزانێت لە داھاتوودا دەبێتە خاوەن یەکەی نیشتەجێبوون و دوودڵ نەبێت، لە ھەوڵداین  تەواوی یەکەکان تەواو بکرێن و خەڵک بچنە ناو یەکەکانی خۆیانەوە.

 
ئەوەی پێویستە بیزانیت: یەکەی نیشتەجێبوونی هەژاران و کەمدەرامەتان بە قیستی درێژخایەن دەدرێت؛ پرۆژەکە حکومییە و بێ پێشەکیە و لە ماوەی 25 ساڵ قیستەکەیان تەواو دەبێت.