پەتای دەم و پەلەکانی ئاژەڵ دەگاتە سنووری هەرێمی کوردستان

ئاڤا نیوز

دوای پارێزگای دیاله، پەتای دەم و پەلەکانی ئاژەڵ گەیشتە ناوچەی گۆگجەلی لە پارێزگای نەینەوا، بەهۆیەوە سەدان ئاژەڵ مرادربوونەتەوە و ڤێتێرنەری پارێزگاکەش هەواڵەکە پشتڕاستدەکاتەوە .

چیرۆکی سەرەکی: بەگوێرەی ئەو ئامارەی لیژنەی تەندروستی ئەنجوومەنی پارێزگای نەینەوا  بڵاویکردووەتەوە، ڤایرۆسی گامێشەکان کە بە تای دەم و پەلەکانی ئاژەڵ ناسراوە، لەناوچەی گۆگجەلی ڕۆژهەڵاتی موسڵ بڵاوبووەتەوە و تاوەکو ئێستاش نزیکەی 800 سەر مانگا مرداربووەتەوە.

لێدوانی فەرمی: مەعاز حاجی، ئەندامی ئەنجوومەنی پارێزگای نەینەوا ڕایگەیاند: تاوەکو ئێستا بەهۆی پەتاکەوە زیاتر لە دوو هەزار سەر ئاژەڵ مرداربوونەتەوە، بەڵام لایەنی پەیوەندیدار  بەتایبەت فەرمانگەی ڤێتێرنەری و شارەوانی موسڵ هەوڵی شاردنەوەی ژمارەی ڕاستەقینەی تووشبووانی ڤایرۆسەکە دەدەن.

لەلایەکی دیکەوە: عومەر حەیالی، بەڕێوەبەری نەخۆشخانەی ڤێتێرنەری نەینەوا بڵاوبوونەوەی پەتاکەی لەناوچەی گۆگجەلی پارێزگای نەینەوا پشتڕاستکردەوە و ئاماژەی بەوەشکرد هەوڵەکانیان بۆ ڕێگریکردن لەبڵاوبوونەوەی ڤایرۆسەکە چڕکردووەتەوە.

زانیاری بەدەستهاتوو: بەپێی ئەو زانیارییانەی دەسـت ئاڤا کەوتووە بڵاوبوونەوەی ئەم ڤایرۆسە بەهۆی هاوردەکردنی ئاژەڵی تووشبوو لە دەرەوەی وڵات بۆ ناوچەی گۆگجەلی ڕۆژهەڵاتی موسڵ بووە.

ئەمەش بزانە: تای دەم و پەلەکان نەخۆشییەکی کۆنە لە عێراق و هیچ مەترسییەک بۆ مرۆڤ دروست ناکات و ڕێژەی مردنیشی کەمە، هەربۆیە بەگوێرەی بەرپرسانی حکومەت دۆخەکە لەژێر کۆنترۆڵدایە و هیچ مەترسییەکی تێدا نییە.