زانیاریی نوێ لەبارەی ئاگرەكەی هەولێر

ئاڤا نیوز

لە ناوچەی پیشەسازی باکوور لە هەولێر ئاگر لە کۆگایەک کەوتووەتەوە، گوتەبێژی بەرگری شارستانی هەولێر دەڵێت 14 تیم سەرقاڵی کوژاندنەوەی ئاگرەکەن، زانیارییە سەرەتاییەکان باس لەوە دەکەن ئاگرەکە بەهۆی شۆرتی کارەباوە بووە.

چیرۆکی سەرەکی: بەرەبەیانی ئەمڕۆ شەممە نزيک کاتژمێر 7:00 ئاگر لە کۆگایەکی ديکۆرات و کەلوپەلی کارەبایی و کەرەستەی بیناسازی ناوچەی پیشەسازی باکوور لە هەولێر کەوتەوە.

لێدوانی فەرمی: کاروان میراودەلی، گوتەبێژی بەرگری شارستانی هەولێر، بە پەیامنێری ئاڤا نیوزی گوت: ئاگرەکە لەژێر کۆنترۆڵدایە و ئەگەر بەمجۆرە کاری لەسەر نەکەین تەواوی بازاڕەکە دەگرێتەوە چونکە ئاگرێکی لوتکەیی بووە، تیمەکانمان زیادکردووە و ئێستا 14 تیممان سەرقاڵی ئاگرەکەن.

زانیاریی زیاتر: لەهەوڵی داپۆشینی ئاگرەکەداین چونکە کۆگایەکی گەورەیە و چەندین جۆر موادی تێدایە و زیانی گیانی نەبووە و زیانە ماددییەکانیش دەبێت بە ڕاپۆرتێک دواتر ئامادەبکرێت.

لەلایەكی دیكەوە: نوێنەری ئەو كۆگایەی ئاگرەكەی لێكەوتووەتەوە، بە ڕزگار كۆچەر پەیامنێری ئاڤا نیوزی گوت: دوای بەرگری شارستانی ڕاستەوخۆ پەیوەندیم بە تۆوە كرد، زیانی ئاگركەوتنەوە لە كۆگاكەش زیاتر لە 10 ملیۆن دۆلارە.