بۆچی ڕووخساری دوو کەشتیوانە ئەمریکییەکە گۆڕانکاریان بەسەر داهاتووە

 

ئاڤا نیوز

ئەم دوو کەشتیوانە ئەمریکییەی 9 مانگ لە بۆشایی ئاسمان مابوونەوە، نیشانەی پیری لە ڕووخساریان دەرکەوتووە، ئێستا بووەتە جێی پرسیار چۆن لەو ماوە کەمەدا بەم جۆرە گۆڕانکارییان بەسەردا هاتووە. پسپۆرانی تەندروستی هۆکارەکانی ڕوون دەکەنەوە.

چیرۆکی سەرەکی: دوو کەشتیوانی ئەمریکی بە ناوەکانی سونیتا ویلیامز و باری ویلمۆر، لە ڕێگەی کەشتی دراگۆنی کۆمپانیای سپەیس ئێکس لە 5ـی حوزەیرانی 2024، بە مەبەستی تاقیکاری چووبوونە وێستگەی بۆشایی ئاسمان و بڕیار بوو تەنیا بۆماوەی هەشت ڕۆژ بمێننەوە بەڵام بەهۆی کێشەیەکی تەکنیکی بۆ ماوەی نۆ مانگ لە وێستگەکە مانەوە.

هۆکارە زانراوەکان: پسپۆرانی تەندروستی دەڵێن: چوونە بۆشایی ئاسمان گۆڕانکاری لە جەستەی مرۆڤ دروست دەکات، دڵ و خوێنبەرەکانی مرۆڤ چیتر خوێن پەمپ ناکەن، چونکە کێش نامێنێ و بەهۆیەوە لاواز دەبن.

٠ بەهۆی نەمانی کێشی زەوییەوە ماسولکەکانی مرۆڤ بارستەیان کەمدەکات، ئەو ئێسکانەی کە لەشیان ڕاگرتووە لە مانگێکدا لە بۆشایی ئاسماندا بە تێکڕایی بە ڕێژەی 1% بۆ 1.5% چڕییان لەدەستدەدەن و بەرگەی زەبری توند ناگرن، دەشکێن. ئەمەش دەبێتە هۆی خێرابوونی پڕۆسەی پیربوون.

٠ هەرچی شلەی لەش هەیە بەخوێنیشەوە بەرەو سەرەوەی لەشی مرۆڤ دەچن دەبنە هۆی هەڵئاوسانی سەر.

٠ بەهۆی وشکبوونەوە یان دەردانی کالیسیۆم لە ئێسکەوە هۆکارە بۆ دروستبوونی بەردی گورچیلە.

٠ بەهۆی بەرکەوتنی تیشکی سەروو وەنەوشەیی لە خۆر، لەشی ئەم کەشتیوانە هێندەی تر پیردەبێت.