وەزیری پێشمەرگە: هیچ ئەفسەرێک لە دەرەوەی مەرجەكان پلەی بەرز ناكرێتەوە

ئاڤا نیوز

 

نووسینگەی وەزیری پێشمەرگە سەبارەت بە چەند لێدوانێكی وەستا ڕەسول، ڕوونكردنەوە دەدات و لێدوانەكان بە بێ بنەما و ناڕاست وەسف دەكات و دەڵێت، هیچ ئەفسەرێک لە دەرەوەی ڕێنمایی و مەرجە یاساییەکان و بەبێ پایە، شایستەی پلەبەرزکردنەوەی جێبەجێ ناکرێت.

چیرۆكی سەرەكی: بەپێی ڕوونكردنەوەکەی نووسینگەی وەزیری پێشمەرگە لە چەند ڕۆژی ڕابردوودا وەستا ڕەسول، فەرماندەی پێشمەرگە لە هێزەكانی یەكێتیی نیشتمانیی كوردستان لە میدیاكانی حیزبەكەی ڕەخنەی  لە سیستمی پلەبەرزكردنەوەی ئەفسەرانی پێشمەرگە گرتووە، بەڵام نووسینگەی وەزیر سەرلەبەری گوتە و لێدوانەكانی ئەو بەرپرسەی یەكێتی ڕەت دەكاتەوە.

 

ڕاگەیێنراوی فەرمی: نووسینگەی وەزیری پێشمەرگە ڕایگەیاند: بە هەوڵی تیمی باڵای وەزارەت توانراوە کاری جددی لەسەر خشتەکانی پلەبەرزکردنەوەی ئەفسەران بکرێت بە کۆی گشتیی لە ساڵی 2019وە تا ئەمڕۆ زیاتر لە 20  خشتەی پلەبەرزکردنەوەی ئەفسەران کە لەوەو پێش کەڵەکەببون و نەکرابوون لە وەزارەت، توانراوە پلەکانیان بەرزبکرێتەوە و پلەیی شایستەی خۆیان وەربگرن.

 

ئەوەی پێویستە بیزانیت: بەشێکی دیکە لە ڕوونکردنەوەکەی وەزیری پێشمەرگە:

 

- ئێستا چەند خشتەیەکی پلەبەرزکردنەوەی ئەفسەران ڕەوانەی ئەنجوومەنی وەزیران کراوە و کارەکانیان تەواوبووە بەمنزیكانە دەگەڕێنەوە و دۆخی پلەبەرزكردنەوەی ئەفسەران خراوەتە سەر ڕاستەڕێی یاسایی و ئاسایی خۆی.

 

- لە وەزارەتی پێشمەرگە بۆ پلەبەرزکردنەوەی ئەفسەران کۆمەڵێک بنەما و مەرج و ڕێنمایمان داناوە کە لەو چوارچێوەیەدا ئەفسەران پلەیان بەرزدەبێتەوە، وەکو تر هیچ ئەفسەرێک لە دەرەوەی ڕێنمایی و مەرجە یاساییەکان و بەبێ پایە، شایستەی پلەبەرزکردنەوەی جێبەجێ ناکرێت. بەمەش کۆتایی بە پلەبەرزکردنەوەی بەلێشاو و نایاسایی و ناسەربازیی هاتووە لە وەزارەتی پێشمەرگە.

 

- دەربارەی ڕاگرتنی نووسراوەکانی هێزەکانی حەفتا لە ناو بەشە کارگێرییەکانی وەزارەتی پێشمەرگە، ڕایدەگەیەنین ئەم بابەتە دوورە لە ڕاستی، نووسراوەکانی هێزەکانی حەفتا کاری یاسایی خۆیی لەسەر دەکرێت و هەر نووسراوێکیان هەبێت لە چوارچێوەی یاسا و ڕێنماییەکاندا جێبەجێ دەکرێت و کراوە. 

 

- هێزی پێشمەرگەی کوردستان لە سەرجەم ماف و شایستەکانیان یەکسانن و بەبێ هیچ جیاوازییەک ئەوەی لە بەردەستی وەزارەتی پێشمەرگەدا بێت بەسەر هەموو یەکە سەربازییەکانی وەزارەتی پێشمەرگەدا دابەشکراوە.

 

- ئێستا وەزارەتی پێشمەرگە لە قۆناغێکی بەهێز و سەرکەوتوودایە و وەک یەک تیمی پێکەوەیی کاردەکەین بۆ گەیشتن بە ئامانجە باڵاکانی هێزی پێشمەرگەی کوردستان و بنیادنانی سوپایەکی یەکگرتووی کوردستانی.