دانیشتنی پەرلەمان بۆ دەنگدان بۆ بەپارێزگابوونی هەڵەبجە دواخرا

ئاڤا نیوز

بڕیاربوو کاتژمێر 8:00ی ئەمشەو پەرلەمانی عێراق کۆبوونەوەی ئاسایی خۆی ئەنجام بدات و تیایدا دەنگ لەسەر پڕۆژەیاسای بەپارێزگابوونی هەڵەبجە بدرێت، بەڵام بەهۆی نەبوونی نیسابی یاسایی بۆ دانیشتن، کۆبوونەوەی پەرلەمان بۆ ماوەی 30 خولەک دواخرا.

بۆچی گرنگە: لە مانگی نیسانی ساڵی 2023ەوە پڕۆژەیاسای بەپارێزگابوونی هەڵەبجە لە پەرلەمانی عێراقە و خوێندنەوەی یەکەم و دووەمی بۆ کراوە و تەنیا خوێندنەوەی سێیەم و دەنگدانی کۆتایی ماوە، سەرەڕای فشارەکانی کوردیش، بەڵام بەهۆی ناکۆکییەوە پڕۆژەیاساکە تێنەپەڕێنراوە.

زانیاریی پەیامنێر: دەروون مەلا ناجی، پەیامنێری ئاڤا لە ناو پەرلەمانی عێراقەوە ڕایگەیاند، تائێستا 100 پەرلەمانتار بۆ دانیشتنەکە گەیشتوونەتە پەرلەمان، لەکاتێکدا بۆ گرێدانی کۆبوونەوەی ئاسایی پەرلەمان پێویستە 50+1ی پەرلەمانتاران ئامادە بن کە دەکاتە 166 پەرلەمانتار، بەوهۆیەش دانیشتنی پەرلەمان بۆ ماوەیەک دواخراوە.

لەلایەکی دیکەوە: نەهلە ئەفەندی، ئەندامی فراکسیۆنی پارتی لە پەرلەمانی عێراق بە ئاڤا میدیای ڕاگەیاند، چاوەڕێی ئەوە لەلایەنەکان دەکەن کە لە کۆبوونەوەی ئەمشەوی پەرلەماندا ئامادە بن و دەنگ بە پڕۆژەیاسای بە پارێزگابوونی هەڵەبجە بدەن، بۆ دەنگدان لەسەر پڕۆژەیاساکەش هەموو هەوڵێک دەخەنەگەڕ.

هۆکارە زانراوەکان: لایەن و فراکسیۆنەکانی شیعە و سوننە چەندین جار تێپەڕاندنی یاسای بەپارێزگابوونی هەڵەبجەیان پەکخستووە، ئەوان داوا دەکەن هەندێک قەزای پارێزگاکانی دیکەی عێراقیش بەیەک پاکێج لەگەڵ هەڵەبجە بکرێنە پارێزگا، بەڵام فراکسیۆنە کوردستانییەکان دەڵێن، هەڵەبجە تایبەتمەندیی خۆی هەیە و ڕەتیدەکەنەوە ئەو پڕۆژەیە بە گۆڕانکاری کارگێڕی دیکەوە ببەسترێتەوە.