ڕێبوار هادی: هەر دانیشتنێکی پەرلەمان هەڵەبجەی تێدانەبێت کورد بەشداریی تێدا ناکات

ئاڤا نیوز

سەرۆکی لیژنەی یاسایی لە پەرلەمانی عێراق ڕایگەیاند، فراکسیۆنە کوردستانییەکان بەشداریی هیچ دانیشتنێکی داهاتووی پەرلەمان ناکەن، ئەگەر پڕۆژەیاسای بە پارێزگابوونی هەڵەبجەی تێدا نەبێت.

ئەوەی پێویستە بیزانیت: بڕیاربوو کاتژمێر 8:00ی ئەمشەو پەرلەمانی عێراق کۆبوونەوەی ئاسایی خۆی ئەنجام بدات و تیایدا دەنگ لەسەر پڕۆژەیاسای بەپارێزگابوونی هەڵەبجە بدات، بەڵام بەهۆی نەبوونی نیسابی یاسایی بۆ دانیشتن، کۆبوونەوەی پەرلەمان بەشێوەیەکی کاتیی دواخرا.

لێدوانی فەرمی: ڕێبوار هادی، سەرۆکی لیژنەی یاسایی لە پەرلەمانی عێراق بە ئاڤا میدیای ڕاگەیاند، حکومەتی عێراق لە زۆر بواردا وەک پارێزگا مامەڵە لەگەڵ هەڵەبجەدا دەکات و ئەوەی لە پەرلەمانیش ماوە تەنیا دەنگدانی کۆتاییە لەسەر بەپارێزگابوونی هەڵەبجە، بۆیە بەستنەوەی ئەم بابەتە بەپارێزگاکردنی قەزایەکی دیکەی عێراق هەڵەیە و ئەوان ڕەتیدەکەنەوە.

- ئێستا چاوەڕێن و گەشبینن تا لە چەند کاتژمێری داهاتوودا دەنگ لەسەر پڕۆژەیاساکە بدرێت، ئەگەریش ئەمڕۆ دەنگی لەسەر نەدرێت فراکسیۆنە کوردستانییەکان بڕیاریانداوە هەر دانیشتنێکی داهاتووی پەرلەمان پڕۆژەیاسای بەپارێزگابوونی هەڵەبجە لە خشتەی کاریدا نەبێت، کورد بەشداریی تێدا ناکات.