ڤیدیۆ؛ ئاگرەکەی هەولێر سەرهەڵدەداتەوە و بەرگریی شارستانی دڵنیایی دەدات

ئاڤا نیوز

ئاگرەکەی ناوچەی پیشەسازیی باکوور لە هەولێر دووبارە سەریهەڵداوەتەوە، بەرگریی شارستانی دڵنیایی دەدات لەوەی مەترسیدار نییە و تیمەکان لە ئامادەباشیدان.

چیرۆکی سەرەکی: کاتژمێر 7:00ی  بەیانی ئەمڕۆ دووشەممە لە ناوچەی پیشەسازی باکوور لە هەولێر ئاگر لە کۆگایەکی ديکۆرات و کەلوپەلی کارەبایی و کەرەستەی بیناسازی کەوتەوە، هەرچەندە تیمەکانی بەرگری شارستانی ئاگرەکەیان کۆنترۆڵ کرد، بەڵام ئێوارە لەژێر داروپەردوی کۆگاکە دیسان سەریهەڵدایەوە.

ئەوەی ئێستا ڕوودەدات: ڕزگار کۆچەر، پەیامنێری ئاڤا نیوز ڕایگەیاند: بەهۆی ئەو ماددانەی لەناو کۆکاگەدا بوون کە زوو ئاگردەگرن وەک "دەبەی غاز، تەپەدۆر و پلاستیک" دووبارە لە کۆگاکە ئاگر سەریهەڵداوەتەوە، تیمەکانی بەرگریی شارستانی ئامادەن و خەرکی کۆنترۆڵکردنی ئاگرەکەن.

لێدوانە فەرمییەکان: کاروان میراودەلی، گوتەبێژی بەرگریی شارستانی هەولێر بە ئاڤا نیوزی گوت: " لە بەیانییەوە شەش جار ئاگرەکە سەریهەڵداوەتەوە، بەردەوام چوار تیمی ئاگرکوژێنەوە ئامادەن بۆ کۆنترۆڵکردن و ڕێگریکردن لە فراوانبوونی، هاونیشمانیان دڵنیا دەکەینەوە هیچ مەترسییەکی نەماوە".

هۆکارە زانراوەکان: ئومێد خۆشناو، پارێزگای هەولێر لەبارەی هۆکارەکەی بە ئاڤا نیوزی گوت: گومان دەکرێت بەهۆی شۆرتی کارەباوە بووبێت، بەڵام تاوەکو ئێستا دڵنیانین و لێکۆڵینەوە بەردەوامە. کاروان میراودەلیش هۆکارەکەی بۆ هەبوونی شۆرتی کارەبا لە ئامێری کارەبایی دەرگای کۆگاکە گەڕاندەوە.