بۆ دەنگدان لەسەر بەپارێزگابوونی هەڵەبجە پەرلەمانتارانی شیعە مەرجیان هەیە

ئاڤا نیوز

ماوەی نزیکەی دوو ساڵە لایەنە شیعی و سوننییەکان لە پەرلەمانی عێراق ڕێگریی لە تێپەڕاندنی یاسای بەپارێزگابوونی هەڵەبجە دەکەن، لە بەرامبەردا داوا دەکەن هەندێک قەزای پارێزگاکانی دیکەی عێراقیش بەیەک پاکێج لەگەڵ هەڵەبجە بکرێنە پارێزگا.

وێنە گەورەکە: بڕیاربوو شەوی ڕابردوو لە پەرلەمان دەنگ لەسەر یاسای بەپارێزگابوونی هەڵەبجە بدرێت، بەڵام بەهۆی تەواونەبوونی نیسابەوە دانیشتنەکە دواخرا. بەشێک لە پەرلەمانتارانی عەرەبیش لەبری ئەوەی بچن نیساب تەواو بکەن، هەر لەنێو کافتریای پەرلەمان بەدیار یارییەکەی عێراق و فەڵستینەوە دانیشتبوون، عێراقیش یارییەکەی دۆڕاند.

ئەوەی پێویستە بیزانیت: بڕیار بوو ئەمشەویش دانیشتنەکە کاتژمیر 8:00 بکرابا، هاوکات بڕگەیەکیش بۆ کارنامەکە زیادکرا بوو، ئەویش خوێندنەوەی دووەمە بۆ یاسای دەستەی حەشدی شەعبی، بەڵام دوای تێپەڕبوونی دوو کاتژمێر نیساب تەواو نەبوو، بەم هۆیەوە دانیشتنەکە بۆ کاتێکی نادیار هەڵگیرا.

لەلایەکی دیکەوە: ژمارەیەک پەرلەمانتاران ئیمزایان کۆکردووەتەوە، بۆ ئەوەی لە بەرامبەر بەپارێزگابوونی هەڵەبجە دەنگ لەسەر بە پارێزگابوونی قەزای زوبێر لە پارێزگای بەسرە بدرێت، بەڵام فراکسیۆنە کوردستانییەکان دەڵێن، هەڵەبجە تایبەتمەندیی خۆی هەیە و ڕەتیدەکەنەوە ئەو پڕۆژەیە بە گۆڕانکاری کارگێڕی دیکەوە ببەسترێتەوە.

 زانیاریی تایبەت: یاڤا میدیا قسەی لەگەڵ هەموو فراکسیۆنە کوردستانییەکان کرد، پارتی، یەکێتی، نەوەی نوێ، یەکگرتوو و کۆمەڵ، هەموویان دەڵین لەسەر قەزییە نیشتمانییەکان کۆدەنگ و یەک بڕیارن، ئەگەر پەرلەمان دەنگ بەپارێزگابوونی هەڵەبجە نەدات، ئەوا لە داهاتوودا ئەوانیش دەنگ بە هیچ پڕۆژەیاسایەک نادەن، تەنانەت دەڵێن بەشداریی هیچ دانیشتنێکی داهاتووی پەرلەمان ناکەن، ئەگەر پڕۆژەیاسای بەپارێزگابوونی هەڵەبجەی تێدا نەبێت.

باکگراوند: لە مانگی چواری ساڵی 2023ەوە پڕۆژەیاسای بەپارێزگابوونی هەڵەبجە لە پەرلەمانی عێراقە و خوێندنەوەی یەکەم و دووەمی بۆ کراوە و تەنیا ماوە دەنگی لەسەر بدرێت.

ئەمەش بزانە: ئەگەر بێت و دەنگ لەسەر بەپارێزگابوونی هەڵەبجە بدرێت، ئەوا بەگوێرەی یاساکە هەڵەبجە  دەبێتە 19هەمین پارێزگای عێراق، بەمەش لەڕووی ئابوورییەوە گەشەی زیاتر بەخۆیەوە دەبینێت، لە بودجەی عێراقیش وەک پارێزگایەک بودجەی تایبەتی خۆی دەبێت.