عێراق تاوتوێی کاریگەریی بڕینی هاوکارییەکانی ئەمریکا دەکات

 

ئاڤا نیوز

وەزیری دەرەوەی عێراق سەرۆکایەتیی کۆبوونەوەیەک بۆ تاوتوێکردنی کاریگەری بڕینی هاوکارییە نێودەوڵەتییەکانی ئەمریکا بۆ بەرنامەکانی نەتەوەیەکگرتووەکان لە عێراق دەکات.

وێنە گەورەکە:  ئیدارەی تڕەمپ بڕیاری دا 83%ـی هاوکارییە نێودەوڵەتییەکانی ئەمریکا بۆ جیهان هەڵبووەشێنێتەوە، نەتەوەیەکگرتووەکانیش ڕایگەیاند، "دەبێت بڕیاری قورس بدەین و کاری لەپێشینە بۆ ڕزگارکردنی گیانی ملیۆنان مرۆڤ دابنێین".

ڕاگەیێنراوی فەرمی: بەگوێرەی ڕاگەیێنراوی وەزارەتی نەوتی عێراق، بەسەرۆکایەتیی د. فوئاد حوسێن، وەزیری دەرەوە، بەئامادەبوونی، حەیان عەبدولغەنی، وەزیری نەوت، تەیف سامی، وەزیری دارایی و ژمارەیەک لە بەرپرسانی حکومی کۆبوونەوەیەک سەبارەت بە کاریگەرییەکانی ڕاگرتنی بودجەی ئەمریکا بۆ بەرنامەکانی نەتەوە یەکگرتووەکان لە عێراق کرا.

لە کۆبوونەوەکەدا کاریگەری ڕاگرتنی بودجە لەسەر بەرنامەکانی نەتەوە یەکگرتووەکان بەتایبەت ئەوانەی پەیوەندییان بە سەنتەری ئەمەل و و کەمپی هۆل و پرسی گەڕانەوەی خێزانە عێراقییەکان لە باکووری ڕۆژهەڵاتی سووریاوە هەیە، تاوتوێ کرا.

پێداچوونەوە و گفتوگۆ لەسەر ڕاسپاردکانی کۆبوونەوەی پێشوو کرا کە لەئەنجوومەنی ئاسایشی نیشتمانی بەڕێوەچوو.

ئەوەی پێویستە بیزانیت: ئەمە دووەم کۆبوونەوەی بەرپرسانی باڵای عێراقە لەبارەی کاریگەرییەکانی بڕینی هاوکارییەکانی ئەمریکا و ڕۆژی 13ـی ئەم مانگە کۆبوونەوەیەکی دیکە کرا و لە کۆبوونەوەکەدا زنجیرەیەک بڕیاری گرنگ دران بۆ پاڵپشتی وەزارەتی کۆچ و دامەزراوە عێراقییەکان کە کار لەسەر ئەم بابەتە دەکەن، بۆ دڵنیابوون لە بەردەوامیی گواستنەوەی خێزانە عێراقییەکان و پڕۆسەی تێکەڵکردنەوەیان بە کۆمەڵگا.