نەتانیاهۆ وەڵامی ئەردۆغان دەداتەوە و بە "کۆمەڵکوژکردنی کورد" تۆمەتباری دەکات

ئاڤا نیوز

بنیامین نەتەنیاهۆ لە وەڵامی قسەکانی ئەردۆغان کە بە هیتلەری چواندبوو، بە "کۆمەڵکوژکردنی کورد" تۆمەتباری دەکات.

وێنە گەورەکە: لە دوای سەرهەڵدانی شەڕی غەززە ناکۆکی کەوتووەتە نێوان ئیسرائیل و تورکیا و بەرپرسانی ئەو دوو وڵاتە بەردەوام لە میدیاکان لێدوانی تووند بەرامبەر یەکتر دەدەن.

چیرۆکی سەرەکی: ڕەجەب تەیب ئەردۆغان، سەرۆککۆماری تورکیا، دوێنێ لە گوتارێکدا بەتووندی پاڵپشتی خۆی بۆ حەماس دووپاتکردەوە، هێرشی کردە سەر نەتانیاهۆ و بە هیتلەری چوواند لە کۆمەڵکوژکردنی خەڵکی فەڵەستین. لە بەرامبەردا  نەتانیاهۆ  بەتووندی وەڵامی دەداتەوە.

لێدوانی فەرمی: بنیامین نەتانیاهۆ، سەرۆکوەزیرانی ئیسرائیل لە تۆڕی کۆمەڵایەتی ئێسک پەیامێکی بڵاوکردووەتەوە و دەڵێت: "لەکاتێکدا ئیسرائیل پابەندە بە یاساکانی شەڕەوە، بانگەشەی ئەخلاقی لە ئەردۆغان وەرناگرێت کە پاڵپشتی لە بکوژان و دەستدرێژیکارانی ڕێکخراوی تیرۆریستی حەماس دەکات".

قووڵتر: لە وەڵامی ئەوەی ئەردۆغان ئیسرائیل بە کۆمەڵکوژی لە غەززە تۆمەتبار دەکات، نەتانیاهۆ دەڵێت "تورکیا هۆلۆکۆستی ئەرمەنەکان ڕەتدەکاتەوە و کورد لە وڵاتەکەی خۆیدا کۆمەڵکوژ" دەکات.