کونسوڵی ڕووسیا بۆ ئاڤا نیوز: پەیوەندییەکانی هەولێر و مۆسکۆ پتەون

ئاڤا نیوز

کونسوڵی ڕووسیا لە هەولێر ڕایدەگەیێنێت، پەیوەندییەکانی نێوان ڕووسیا و هەرێمی کوردستان لە هەموو ڕووێکەوە باش و پتەون.

چیرۆکی سەرەکی: ئەمڕۆ یەکشەممە ڕۆژی جلی نەتەوەییە لە هەرێمی کوردستان، بەم بۆنەیەوە ئومێد خۆشناو، پارێزگاری هەولێر، ماکسیم ڕوبین، کونسوڵی گشتیی ڕووسیای بۆ بازاڕی هەولێر بانگهێشت کرد.

ئومێد خۆشناو و ماکسیم ڕوبین پیاسەیەکیان بەنێو بازاڕی هەولێردا کرد و چایەکیان لە چایخانەی مەچکۆ خواردەوە، دواتر سەردانی بازاڕی قەیسەرییان کرد و پێکەوە بۆ نیوەڕۆ کەبابیان خوارد.

لێدوانە فەرمییەکان: ماکسیم ڕوبین لەبارەی پەیوەندییەکانی هەرێمی کوردستان و ڕووسیا بە ئاڤا نیوزی گوت: "پەیوەندییە سیاسی و ئابووری و کولتوورییەکانی هەولێر و مۆسکۆ زۆر باش و پتەون، من لەسەر بانگهێشتی پارێزگاری هەولێر لەم شوێنە شیرین و مێژووییەم، هیوای ئارامی و بەهارێکی خۆش بۆ گەلی کورد دەخوازم".

هاوکات ئومێد خۆشناو، پارێزگاری هەولێر لە لێدوانێکی ڕۆژنامەوانیدا گوتی: بەمەبەستی بەهێزکردنی پەیوەندییەکانی حکومەتی هەرێم لەگەڵ مۆسکۆ، لە چایخانەی مەچکۆ لەگەڵ کوسوڵی گشتیی ڕووسیا کۆبووینەوە، بە بۆنەی ڕۆژی جلی نەتەوەییەوە پێمخۆش بوو لێرە کۆببینەوە". ئاماژەی بۆ ئەوەش کرد کونسوڵی ڕووسیا وەک ئامادەکاری بۆ جەژنی نەورۆز ئەمڕۆ جلی کوردی بەدوورین دەدات.

 

لێدوانی کونسوڵی گشتیی ڕووسیا لە هەولێر بۆ ئاڤا نیوز