پێنج کەس بەهۆی ڕووداوەکانی یاریی دهۆک و زاخۆ دەستگیرکران

ئاڤا نیوز

لەسەر ڕووداوەكانی یاریی شەوی ڕابردووی نێوان دهۆك و زاخۆ، پۆلیسی دهۆک پێنج كەسی دەستگیرکرد، بڕیاری دەستگیركردن بۆ چەند كەسێكی دیكەش دەرچووە.

چیرۆکی سەرەکی: شەوی ڕابردوو یاریی دهۆک و زاخۆ لە خولی تۆپی پێی ئەستێرەكانی عێراق لە یاریگەی دهۆک ئەنجامدرا، یانەی دهۆک بە 1-0 گۆڵ بردییەوە، لە دوای یارییەكە ئاژاوە دروست بووە، ناڕەزایی زۆری لێکەوتەوە.

لێدوان فەرمی: هێمن سلێمان، وتەبێژی پۆلیسی پارێزگای دهۆک، لە کۆنگرەیەکی ڕۆژنامەوانیدا، ڕایگەیاند، ئەو کەسانەی ئەو کارەیان کردووە، ڕووبەڕووی یاسا دەکرێنەوە هەر کەسە و بەگوێرەی تاوانەکەی سزا دەدرێت، هەر بۆیە شەوی ڕابردوو لە دوای یارییەکە، پۆلیس و ئاسایشی دهۆک بەدواداچوونەکانیان دەست پێکردووە.

- پێنج کەس دەستبەسەر کراون، لێكۆڵینەوەكان لە بارەی ڕووداوەكان بەردەوامن و فەرمانی دەستگیركردن بۆ چەند كەسێكی دیكەش دەرچووە.

- ئەوەی ڕوویداوە دوورە لە گیانی دۆستایەتی نێوان خەڵكی دهۆك و زاخۆ، ئەوانەی بوونەتە هۆكاری ئەو كێشەیە، ڕووبەڕووی یاسا دەكرێنەوە، جا گرنگ نییە هەر كێ بێت و لە هەر پلە و پۆستێكدا بێت، تەنانەت ئەندامی یانەكان بن، ئەو کەسانەی لەڕێگەی سۆشیال میدیاوە قسەی نەشیاو و بێڕێزیان کردووە، دەستگیرکراون.

- "نایەڵین حەز و ئامانجی ئەو كەسانە بێتەدی كە دەیانەوێت دووبەرەكی و دوژمنایەتی لە نێوان خەڵكی دهۆک و زاخۆ دروست بكەن"، ئەو کەسانە نیازی ئاژاوەگێڕییان هەبووە، تەنیا گوزارشت لەخۆیان دەکەن، نەک هیچ یانە و شارێک.

لەلایەکی دیکەوە: دوای ڕووداوەکە، یانەی زاخۆ ڕێککەوتنی لەگەڵ یانەی دهۆک هەڵوەشاندەوە کە لە چوار خاڵ پێکهاتووە:

- یانەی زاخۆ ڕێككەوتنی خۆی لەگەڵ یانەی دهۆك لەبارەی ئامادە نـەبوونی هاندەرانی لە دێربی بادینان هەڵوەشاندەوە.

- سكاڵا لەسەر بەشێك لە هاندەران و ئەو كەسانە تۆمار دەكەن كە پێیانوایە كەسانی نزیكن لەكارگێڕی یانەی دهۆك و بێڕێزییان بە یانەی زاخۆ كردووە.

- یانەی زاخۆ دوو سكاڵا لە دژی مەسعود میرال، ڕاهێنەری یانەی دهۆك تۆمار دەكات، یەكێكیان لە دادگای زاخۆ، ئەویتریان لە فیدراسیۆنی تۆپی پێی عێراق.

- سكاڵا لەسەر ئەو دەزگا و ڕاگەیاندنانە تۆمار دەكەن كە هەوڵی دروستكردنی كێشە و ئاڵۆزییان لەنێوان هەردوو یانەکە داوە.