سه‌رۆكايه‌تيى هه‌رێمى كوردستان بەدواداچوون بۆ ڕووداوەکەی دهۆک دەکات

ئاڤا نیوز

بەهۆی ئەو هێرشە تاوانکارییەی دوێنی کرایە سەر ئاهەنگگێڕانی هاوڵاتییانی مەسیحی بە بۆنەی جەژنی ئەکیدۆ لە شاری دهۆک، سه‌رۆكايه‌تيى هه‌رێمى كوردستان بەدواداچوون بۆ ڕووداوەکە دەکات و دڵنیایی دەدات لە پێکەوە ژیان لە کوردستان.

چیرۆکی سەرەکی: دوێنی سێشەممە لەکاتی بەڕێوەچوونی ڕێوڕەسمی جەژنی ئەکیتۆ بە بەشداریی سەدان هاووڵاتیی پێكهاتەكانی كلدان، سریان و ئاشووری لە شاری دهۆک، گەنجێک بە چەقۆ هێرشیکردە سەر ئامادەبووان و بە هۆیەوە دوو کەس بریندار بوون.

ڕاگەیێنراوی فەرمی: لە ڕاگەیێنراوێکدا، سه‌رۆكايه‌تيى هه‌رێمى كوردستان دەڵێت، له‌ نزيكه‌وه‌ له‌گه‌ڵ ده‌زگا په‌يوه‌نديداره‌كانى هه‌رێمى كوردستان به‌دواداچوون بۆ ئه‌و هێرشه‌ تاوانكارييه‌ ده‌كات كه‌ دوێنێ له‌ ڕووداوێكى نامۆدا له‌ دهۆك، كۆمه‌ڵێك له‌ جه‌ژنگێڕانى ئه‌كيتۆ له‌ هاووڵاتييانى مه‌سيحيمان تێيدا به‌ ئامانج گيران و بووه‌ هۆى برينداربوونى دوو كه‌س.

له‌ كاتێكدا به‌ توندى ئه‌و تاوانه‌ سه‌ركۆنه‌ ده‌كه‌ين، هه‌موو كوردستانييان دڵنيا ده‌كه‌ينه‌وه‌ كه‌ هه‌رێمى كوردستان وه‌ك هه‌ميشه‌ به‌ نیشتمانی پێكه‌وه‌ژيان و ئارامى و سه‌قامگيرى بۆ هه‌موو پێكهاته‌كانى ده‌مێنێته‌وه‌ و به‌ هیچ شێوه‌يه‌ك ڕێگه‌ به‌ تێكدانى كولتوورى پێكه‌وه‌ژيان و يه‌كترقبووڵكردن و لێبورده‌يى نادرێت، تاوانكاريش به‌ سزاى ياساييى خۆى ده‌گات.