محەممەد حاجی مەحمود: پێویستە پارتی و یەكێتی لەم مانگەدا بگەنە ڕێككەوتن

ئاڤا نیوز

 

محەممەد حاجی مەحمود بەپێویستی دەزانێت، پارتی و یەكێتی لەم مانگەدا بگەنە ڕێككەوتن بۆ پێكهێنانی حكومەت، دەشڵێت، هێشتا زووە باس لەوە بكرێت كە حیزبەكەی ئەوان كام وەزارەتی بەردەكەوێت.

 

چیرۆكی سەرەكی: محەممەد حاجی مەحمود، سکرتێری گشتیی پارتی سۆسیال دیموکراتی کوردستان لە كۆنفرانسێكی ڕۆژنامەوانیدا قسەی بۆ دەزگاكانی ڕاگەیاندن كرد و وەڵامی پرسیارەكانی پەیوەست بە پێكهێنانی كابینەی داهاتووی حكومەتی هەرێمی كوردستانی دایەوە.

 

لێدوانی فەرمی: محەممەد حاجی مەحمود ڕایگەیاند، بەلەبەرچاوگرتنی كێشە و ئاڵۆزییەكانی ناوچەكە، چەندە زووتر كابینەی داهاتووی حكومەتی هەرێمی كوردستان پێكبهێندرێت؛ باشترە، بۆیە پێویستە لەم مانگەدا بگەنە ڕێككەوتن.

- تا پارتی و یەكێتی لەسەر دیاریكردنی پۆستەكانی دەستەی سەرۆكایەتیی پەرلەمان و سەرۆكایەتیی حكومەت ڕێكنەكەون، ئەستەمە بتوانن پۆستە وزارییەكانی دیكە یەكلایی بكەینەوە.

- كاتێك گەورەترین فراكسیۆنی پەرلەمانی ڕادەسپێردرێت بۆ پێكهێنانی حكومەت، ئەو فراكسیۆنە سەردانی لایەنەكان دەكات بۆ پێدانی بەركەوتەی هەڵبژاردن، ئەوكات دەزاندرێت كامە وەزارەت بەر پشكی حیزبی سۆسیالیست دیموكراتی كوردستان دەكەوێت.