بەریتانیا بۆ هاووڵاتییانی: لە کاتی گەشتکردن تەنها هەرێمی كوردستان و 8 پارێزگای عێراق سەلامەتن

ئاڤا نیوز

 

حكومەتی بەریتانیا هۆشداری بە هاووڵاتییانی دەدات، خۆیان بەدوور بگرن لە گەشتكردن بۆ بەغدا و پارێزگاكانی ناوەڕاست و ڕۆژئاوای عێراق، ئامۆژگارییان دەكات بەوەی ئەگەر سەردانی ئەو وڵاتەش دەكەن، بچنە هەرێمی كوردستان و هەشت پارێزگای باشووری عێراق.

 

ڕاگەیێنراوی فەرمی: بەگوێرەی ڕاگەیێنراوی وەزارەتی دەرەوەی بەریتانیا كە ئەمڕۆ 3ـی نیسانی 2025 نوێكراوەتەوە، بەریتانیا لەپێناو پاراستنی سەلامەتیی هاووڵاتیانی ئامۆژگارییان دەكات سەردانی شاری بەغدا و شەش پارێزگای دیكەی عێراق نەكەن تا كاتێكی نادیار و ئەو شوێنانەی بە زۆنی سوور ڕەنگ كردووە.

 

ئەوەی پێویستە بیزانیت: حكومەتی بەریتانیا ڕوونیكردووەتەوە، شاری بەغدا و پارێزگاكانی ئەنبار، دیالە، كەركووك، نەینەوا، سەڵاحەددین، بەسڕە (جگە لە سەنتەری شاری بەسڕە) شیاو نین بۆ گەشتكردن و سەلامەتی هاووڵاتیانی بەریتانی لەو شوێنانە زەمانەتكراو نابێت.

زانیاریی زیاتر: "ئەگەر پێویستی كرد هاووڵاتیانی بەریتانی گەشت بۆ عێراق بكەن، ئەوا سێ پارێزگای هەرێمی كوردستان، سەنتەری شاری بەسڕە، پارێزگاكانی كەربەلا، نەجەف، بابل، قادسیە، زیقاڕ، واست، میسان و موسەننا، بەراورد بە شوێنەكانی دیكە شیاوترن. هاوکات لە هەرێمی كوردستانیش ناوچە سنوورییەكانی توركیا بەهۆی بوونی بنكە و بارەگاكانی پەكەكە و مەترسی بۆردوومانی فڕۆكە و تۆپخانەكانی توركیا، گونجاو نین و لە زۆنی سوور هەژماركراون".