فازڵ میرانی: پارتی ڕژدە لەسەر ئەوەی بەخۆداچوونەوە بكرێت لە كوردستان

ئاڤا نیوز

 

لە ڕێوڕەسمێكدا بارەگای مەكتەبی ڕێكخستنی كەركووك - گەرمیانی پارتی دیموكراتی كوردستان لە شاری كەركووك كرایەوە و بەرپرسی دەستەی كارگێڕیی مەكتەبی سیاسیی حیزبەكەش دەڵێ، پارتی هەر لە كەركووك بووە و دەشبێت.

 

وێنە گەورەکە: دوای ڕووداوەکانی 16ـی ئۆکتۆبەر، هێزە عێراقییەکان دەستیان بەسەر بارەگاکانی پارتی لە کەرکووکدا گرت. دوای شەش ساڵ و بەدیاریکراوی لە 26-11-2023، پارتی بارەگای لقی سێی خۆی لە شاری کەرکووک بە هەڵدانی هەزاران ئاڵای کوردستان کردەوە، کە لەسەر ئەرکی خۆیشی بارەگاکەی نۆژەنکردەوە، ئەمڕۆ شەممەش بە کردنەوەی بارەگای مەکتەبی ڕێکخستنی کەرکووک-گەرمیانی پارتی دیموکراتی کوردستان، پێگە و هەبوونی سیاسی و جەماوەری خۆی لە پارێزگاکە پتەوتر دەکات.

 

لێدوانی فەرمی: فازڵ میرانی، بەرپرسی دەستەی كارگێڕیی مەكتەبی سیاسیی پارتی لە ڕێوڕەسمەكەدا ڕایگەیاند: ئێمە هەر لە كەركووك بووین و لە كەركووكیش دەبین، ئەگەر بە جەستەش بۆ ماوەیەك لە كەركووك نەبووبین بە چەند هۆكارێك، بەڵام هەمیشە ڕێكخستن و بیروباوەڕی  كوردایەتی كە بیروباوەڕی ڕێبازی بارزانی و پارتی دیموكراتی كوردستانە، ڕەگ و  ڕیشەی لە كەركووك هەبووە و دەشمێنێ و ڕۆژ بە ڕۆژیش زیاد دەكات.

 

 ئەوەی پێویستە بیزانیت: بەشێکی دیکە لە قسەکانی فازڵ میرانی:

 

 - كە باسی كەركووك دەكەین وا باشترە یادی ئەو كەسانە بكەین كە سەرقافڵە بوون لە خەباتی پارتایەتی و كوردایەتی و شۆڕشگێڕی لە كەركووك.

 

- ئەوانەی ئەمڕۆ خۆیان بە بەهێز دەزانن، لەسەر حیسابی كەموكوڕییەكانی كوردە، ئەگینا هیچ كاتێك ئەوەندە بەهێز نەبوون كە بتوانن نكۆڵی لە دەستوور و پەیمانەكانی دوێنێ و پێكەوەژیان بكەن، تەنانەت وا خۆیان دەبینن كە دەتوانن حوكم لەسەر شێوەی دابەشكردنی مووچە و داهاتی وڵات بكەن، بوونی ئێمە لە كەركووك بەمشێوەیەی ئێستا هێزێكی دیكە دەداتە پێكەوەژیان، خۆزگەم دەخواست نوێنەرانی حیزبەكانی دیكەی كوردستان لەم ڕێوڕەسمە ئامادە بووبان، كەواتە پارتی دەبێت بە ئەركی ئەم پێكەوەییە هەڵسێت و جارێكی دیكە سەرجەم پارت و پێكهاتەكان كۆبكاتەوە.

 

- پارتی ڕژدە لەسەر ئەوەی بەخۆداچوونەوە بكرێت لە كوردستان، هەرچی پێویستە بكرێت بۆ یەكڕیزی و گەڕانەوەی هێزی كوردستانی لە پەلەكردن خستنەسەركاری پەرلەمانی كوردستان و پێكهێنانی حكومەت.

 

- سەرەڕای بوونی سەرجەم پێكهاتەكان؛ كەركووك هەر كوردستانییە.