لە كوردستان خۆپیشاندان و ناڕەزاییەكان 78% كەمبووەتەوە

ئاڤا نیوز

مانگی ڕابردوو خۆپیشاندان و ناڕەزاییەکان بەشێوەیەکی گشتی، بەڕێژەی 78% کەمیکردووە و ناڕەزایی بۆ نەدانی مووچەش کۆتاییهاتووە. وتەبێژی دەستەی سەربەخۆی مافی مرۆڤیش دەڵێت، بەهۆی دابەشکردنی دوو مووچە لە کەمتر لەیەک مانگدا، وایکرد ناڕەزایی خەڵک نەمێنێت.

 

وێنە گەورەکە: هاوپەیمانیی 19 - کە ناوەکەی لە بەندی 19ـی جاڕنامەی جیهانی مافی مرۆڤەوە وەرگیراوە و باس لە مافی ئازادیی ڕادەربڕین دەکات- وەک تۆڕێکی سەربەخۆ لە کۆمەڵێک داکۆکیکاری مافی مرۆڤ و رێکخراوی مەدەنی پێکدێت و سەنتەری میترۆ سەرپەرشتی دەکات، مانگانە ڕاپۆرتی ڕەوشی مافی مرۆڤ و ئازادییەکان لە هەرێمی کوردستان بڵاودەکاتەوە.

 

ڕاگەیێنراوی فەرمی: تۆڕی هاوپەیمانی 19 ڕایدەگەیێنێت، مانگی ڕابردوو، ناڕەزایی جەماوەریی بەرفراوان، وەک مانگرتنی مامۆستایان و فەرمانبەرانی ناڕازی، نەبووە و گردبوونەوەی ناڕەزایی بەرامبەر نەدانی مووچە بە رێژەی 91٪ کەمی کردووە و هیچ گردبوونەوەیەک بۆ پشتیوانیکردن یاخود دژایەتیکردنی پرۆسەی بەبانکیکردن لەڕێگەی هەژماری من ئەنجام نەدراوە. دیارترین خۆپیشاندان لە سلێمانی بۆ مافی ژنان رێکخراوە و لە هەولێریش دوو چالاکوان دەستگیر کراوون.

 

لێدوانی فەرمی: سولێمان موحسن، وتەبێژی دەستەی سەربەخۆی مافی مرۆڤ تایبەت بە ئاڤا ڕایگەیاند، بەوپێیەی لە ماوەیەکی کورتدا دوو مووچە بەسەر فەرمانبەران دابەشکرا، وایکرد ناڕەزایی خەڵکی بەرەو نەمان بچێت.

 

ژمارەکان وادەڵێن: لەمانگی ئادار 12 گردبوونەوە و خۆپیشاندان ئەنجام دراون 7 لە سلێمانی و 5 لە هەولێر، لە دهۆک و هەڵەبجە هیچ چالاکییەکی ناڕەزایی تۆمار نەکراوە، ئەمەش دەریدەخات بەراورد بە مانگی شوبات، 78% کەمیکردووە کە مانگی شوبات، 54 چالاکیی ناڕەزایی و خۆپیشاندان ئەنجامدرابوون.

 

قووڵتر: داخوازییەکان بەم شێوەیە بوون: چوار بۆ مافەکانی ژنان، سێ بۆ خزمەتگوزاری، دوو بۆ مووچە. سێ چالاکیی دیکە دژ بە سیستمی تەندروستی، بۆ مافی خاوەن پێداویستیی تایبەت، و ئازادیی رۆژنامەگەری بوون