گەنجێک لە هەولێر 700 هەزار دۆلار دەدۆزێتەوە و لەڕێگەی ئاڤاوە پەیامی هەیە

ئاڤا نیوز

 

گەنجێک لە هەولێر چەند مانگێکە بڕێکی زۆر پارەی دۆزیوەتەوە و ئێستا لەڕێگەی ئاڤاوە داوا دەکات کێ خاوەنییەتی پەیوەندی پێوە بکات.

 

چیرۆکی سەرەکی: شەش مانگ پێش ئێستا گەنجێکی شاری هەولێر بە ناوی موبین لە گەڕەکی شۆڕشی هەولێر دوای ئەوەی لە ماڵەوە دێتە دەرەوە عەلاگەیەک لە بەردەم ماڵەوەیان دەدۆزێتەوە، کە بڕێکی زۆر دۆلاری ئەمریکی تێدایە کە وەک خۆی دەڵێت، نزیکەی 600 بۆ 700 هەزار دۆلارە. 

 

زانیاریی زیاتر: دوای ئەوەی موبین پارەکە هەڵدەگرێتەوە، بۆ دڵنیابوونەوەی لەوەی پارەکە تەزویرە یاخود نا، پارەکە دەباتە نووسینگەیەکی ئاڵوگۆڕی دراو، دواتر دەردەکەوێت پارەکە تەزویر نییە و ئەسڵییە.

 

ئەوەی پێویستە بیزانیت: موبین، دواتر لە ڕێگەی هاوڕێ، خزم و بڵنگۆی مزگەوتەکانەوە بانگەواز و ئاگاداری بڵاو دەکاتەوە، بەهیوای ئەوەی خاوەنی پارەکە پەیوەندی پێوە بکات، بەڵام وا بۆ ماوەی شەش مانگ دەچێت هیچ کەسێک پەیوەندی پێوە نەکردووە و بڵێت: پارەکە هی ئەوە.

 

لێدوانی فەرمی: موبین بە ئاڤا میدیای ڕاگەیاند، تا ئێستا یەک سەنتی لە پارەکە نەخواردووە و تا ئەو کاتەی دەیگەڕێنێتەوە بۆ خاوەنەکەی، ئامادە نییە هیچ بڕێک لەو پارەیە خەرج بکات.

 

چی ڕوویدا: دوای نائومێدبوونی لە دۆزینەوەی خاوەنی پارەکە؛ گەنجەکە پەیوەندی بە عوبێد بەشار، پەیامنێری ئاڤاوە دەکات تاوەکوو لە گەشتی هەواڵەکانی کاتژمێر حەوتی ئاڤا هەواڵی دۆزینەوەی پارەکە بڵاوبکرێتەوە، بەهیوای ئەوەی لەو ڕێگەیەوە خاوەنی پارەکە بدۆزنەوە.  

 

لەلایەکی دیکە: مامۆستا موتەڵیب خەسرۆ عومەر، ئیمام و خەتیبی  مزگەوتی شەهید نەجمەدین لە هەولێر دەڵێت:  لە ڕووی شەرعیشەوە هەتا ساڵێک  دەبێت موبین بانگەواز بکات بۆ پارەکە، ئەگەر کەس نەبوو، ئەوا خۆی ئازادە چی لێ دەکات.