ئەوقافی سلێمانی پڕۆژەی "بانگبێژی شار" ڕادەگەیێنێت

ئاڤا نیوز

 

ئاگاداری سەرجەم بانگبێژانی سلێمانی دەکرێتەوە، هەر کەسێک دەنگی خۆشە و شارەزایی لە مەقامەکاندا هەیە سەردانی بەڕێوەبەرایەتیی ئەوقافی سلێمانی بکات، بۆ پڕۆژەی بانگبێژی شار.

 

وێنە گەورەکە: بە مەبەستی ڕێکخستنەوەی بانگدان لە مزگەوتەکان بەڕێوەبەرایەتیی ئەوقافی سلێمانی پڕۆژەی بانگبێژی شاری ڕاگەیاندووە و لیژنەیەک پێکهاتووە بۆ هەڵبژاردنی ئەو کەسانەی دەنگیان خۆشە و شارەزاییان هەیە لە مەقامەکان. ئامادەکاری کراوە بۆ ئەوەی یەک بانگ بدرێت لە سەرجەم مزگەوتەکان، لەدوای جێبەجێکردنی ئەم پڕۆژەیە: کەس لە خۆیەوە ناتوانێت بانگ بدات، یەک کەس  بانگ دەدات  و لە هەموو مزگەوتەکان پەخش دەکرێت.

 

لێدوانی فەرمی: عەباس خدر، بەڕێوەبەری ئەوقافی سلێمانی بە ئاڤا میدیای ڕاگەیاند، هاوشێوەی هەولێر و دهۆک، لە سلێمانیش ستۆدیۆیەک دانراوە و لەوێوە بانگ دەدرێت. لە شاری سلێمانی و لەهەر کاتێکدا ڕاستەوخۆ بانگ دەدرێت و تۆمار ناکرێت، مەرجە کەسی بانگبێژ، بانگەکە لەسەر مەقامە کوردی و عێراقیەکان بخوێنێت و نابێت تێکەڵ بکرێت بە مەقامی تورکی و ئێرانی. هاوکات دەنگی خۆش بێت و بانگی ڕەوان بێت.

 

زانیاریی زیاتر: "لیژنەیەک پێکهێنراوە لە 15-4-2025، هەڵسەنگاندن بۆ دەنگی ئەو بانگبێژانە و چەند کەسێک هەڵدەبژێردرێت، بۆ ئەوەی بانگدان لە شاری سلێمانی یەکبخرێتەوە، تائێستا 150 کەس ناوی خۆیان تۆمار کردووە، بەڵام نزیکەی 35 کەسمان پێویستە بۆ پرۆسەکە". بەڕێوەبەری ئەوقافی سلێمانی وادەڵێت.

 

ئەوەی پێویستە بیزانیت: لە ماوەی ڕابردوو، ئەم پڕۆژەیە لە شاری هەولێر و دهۆک کەوتە بواری جێبەجێکردن، بەڵام بەهۆی چەند کێشەیەکی تەکنیکی لە شاری سلێمانی دواکەوت.