شوێنی وەرزش و ڕاكردنی پاركی سامی عەبدولڕەحمان نۆژەن دەكرێتەوە

ئاڤا نیوز

ڕاڕەوی ڕاكردنی هاووڵاتیان لە پاركی سامی عەبدولڕەحمان نۆژەن دەكرێتەوە، بۆ ئەم مەبەستەش سەرۆكایەتی شارەوانیی هەولێر تەندەری پرۆژەكە ڕادەگەیەنێت.

وێنە گەورەكە: ڕۆژانە ژمارەیەكی زۆری هاووڵاتیان بە مەبەستی دابەزاندنی كێشیان و باشتركردنی تەندروستییان، ڕوو لە ڕاڕەوی وەرزش و ڕاكردن نێو پاركی سامی عەبدولڕەحمان دەكەن لە شاری هەولێر، ئێستاش تارتانی شوێنەكە كۆن بووە و پێویستی بە نۆژەنكردنەوە هەیە، بۆ ئەم مەبەستە بەشی هونەری و سەرپەرشتیی پرۆژەكان لە سەرۆكایەتی شارەوانیی هەولێر بەنووسراوی فەرمی بانگەوازییەك بۆ سەرجەم كۆمپانیا و بەڵێندەرەكان بڵاودەكاتەوە.

نووسراوی فەرمی: شارەوانیی هەولێر بە نووسراوێكی فەرمی كە وێنەیەكی دەست ئاڤا میدیا كەوتووە، كەمكردنەوەی نهێنی ڕادەگەیەنێت بۆ پرۆژەی هەڵگرتنی تارتانی كۆن و دووبارە دانانەوەی تارتانی شوێنی وەرزشكردن لەنێو پاركی سامی عەبدولرەحمان، داواش لە هەر بەڵێندەر و كۆمپانیایەك دەكات كە ئارەزووی بەشداربوونی هەیە، سەر لە بەشی ژمێریاریی سەرۆكایەتییەكە بدات بەمەبەستی وەرگرتنی وێنەیەك لە تەندەر و مەرجەكانی بەڵێندەرایەتی.

ئەوەی پێویستە بیزانیت: دوا مۆڵەت بۆ بەشداربوون لە تەندەرەكە ڕۆژی یەكشەممە ڕێككەوتی 27-4-2025 كاتژمێر 11ـی پێشنیوەڕۆیە، بەو مەرجەی كۆمپانیا و بەڵێندەران ئەستۆپاكی باجی دەرامەت بهێنن و لەماوەی 120 ڕۆژ پرۆژەكە تەواو بكەن، لەبەرامبەر دواكەوتنی هەر ڕۆژێكی پرۆژەكە بڕی 600 هەزار دینار لە كۆمپانیای جێبەجێكار وەردەگیرێت.