فوئاد حوسێن: هیوادارین دانووستاندنەکانی ئەمریکا و ئێران سەقامگیریی ناوچەکەی لێبکەوێتەوە

ئاڤا نیوز

 

فوئاد حوسێن، جێگری سەرۆکوەزیران و وەزیری دەرەوەی عێراق پێشوازی لە دانووستاندنەکانی نێوان ئەمریکا و ئێران دەکات و دەڵێت، "هیوادارین دەرئەنجامەکانی سەقامگیری ناوچەکەی لێبکەوێتەوە."

 

وێنە گەورەکە: بڕیارە ئەمڕۆ شەممە 12-4-2025، ستیڤ ویتکۆف، نێردەی سەرۆکی ئەمریکا بۆ ڕۆژهەڵاتی ناوەڕاست و عەباس عێراقچی، وەزیری دەرەوەی ئێران، بە ئامانجی گەیشتن بە ڕێککەوتن لەسەر بەرنامە ئەتۆمییەکەی تاران لە عومان کۆببنەوە.

 

ڕاگەیێنراوی فەرمی: وەزارەتی دەرەوەی عێراق لە بەیاننامەیەکدا ڕایگەیاند: لەمیانی بەشداریکردنی لە چوارەمین کۆڕبەندی دیپلۆماسی ئەنتاڵیا، فوئاد حوسێن، لەگەڵ  سەعید خەتیبزادە، جێگری وەزیری دەرەوە و سەرۆکی شاندی ئێرانی بەشدار لە کۆڕبەندی دیپلۆماسی ئەنتالیا کۆبووەوە.

 

زانیاریی زیاتر: "هەردوولا باسیان لە پێشهاتەکانی ئێستای ناوچەکە بەتایبەتی لە سووریا و لوبنان و یەمەن کردووە و وەزیری دەرەوەی عێراق پێشوازیی وڵاتەکەی لە دانووستاندنەکانی نێوان ئەمریکا و ئێران دەکات بۆ چارەسەرکردنی ڕیشەیی کێشەکانی ناوچەکە."

 

لەلایەکی دیکەوە: جێگری وەزیری دەرەوەی ئێران بانگهێشتی فەرمی وەزیری دەرەوەی عێراقی کرد بۆ بەشداریکردن له کۆڕبهندی وتووێژی تاران که بڕیاره له 16 تا 19-6-2025 به ڕێوه بچێت.