سوودانی گەیشتە هەولێر

ئاڤا نیوز

 

سەرۆکوەزیرانی عێراق بە سەردانێك گەیشتە هەولێری پایتەختی هەرێمی كوردستان و لەگەڵ بەرپرسانی باڵای هەرێمی كوردستان كۆدەبێتەوە.

 

زانیاریی بەدەستهاتوو: پێشنیوەڕۆی ئەمڕۆ 12-4-2025، محەممەد شیاع سوودانی، سەرۆكوەزیرانی عێراق گەیشتە شاری هەولێر و لە فڕۆكەخانەی نێودەوڵەتیی هەولێر لەلایەن سەرۆكوەزیران مەسرور بارزانییەوە پێشوازیی لێ كرا و لە هۆڵی پێشوازیی فڕۆكەخانە دیدارێكی كورتیان ئەنجام دا.

 

زانیاریی زیاتر: ڕێبەر ئەحمەد، وەزیری ناوخۆی حكومەتی هەرێمی كوردستان و ژمارەیەك لە بەرپرسانی دیكەی حكومەت یاوەری سەرۆكوەزیران مەسرور بارزانی بوون بۆ پێشوازی لە سوودانی.

 

ئەوەی پێویستە بیزانیت: سوودانی لە سەردانی بۆ هەولێر لەگەڵ سەرۆک بارزانی و سەرۆکوەزیران مەسرور بارزانی کۆدەبێتەوە و تاوتوێی چەند پرسێک لەوانە: پەیوەندییەکانی نێوان هەولێر و بەغدا، پرسی هەناردەکردنەوەی نەوتی هەرێمی کوردستان و هەڵبژاردنەکانی داهاتووی پەرلەمانی عێراق و کێشە هەڵپەسێردراوەکانی نێوان هەولێر و بەغدا.

 

ئەمەش بزانە: لەدوای دەستبەکاربوونی وەک سەرۆکوەزیرانی عێراق، ئەمە جاری چوارەمە محەممەد شیاع سوودانی، سەردانی هەرێمی کوردستان دەکات، جاری یەکەم لە مانگی سێی ساڵی 2023 بوو، سەردانی دووەمیان لە مانگی حەوتی هەمان ساڵدا بوو، جاری سێیەمیش لە نۆڤەمبەری ساڵی ڕابردوو بوو ، بەڵام ئەمە یەکەم سەردانییەتی لە ساڵی 2025.