گۆڕستانێک لە کەرکووک دەدۆزرێتەوە و زیاتر لە هەزار ڕووفاتی ئەنفالی تێدایە

ئاڤا نیوز

 

لە نزیك سەربازگەی كۆنی تۆپزاوە گۆڕستانێک دۆزراوەتەوە کە بەپێی بەڵگەنامەکان گۆڕی زیاتر لە هەزار ئەنفالکراوی تێدایە کە لەدوای ئەشکەنجە گیانیان لەدەستداوە و لەو گۆڕستانەدا بەخاک سپێردراون.

 

چیرۆكی سەرەكی: ژمارەیەك چالاکوانی بواری جینۆساید و ئەنفال لە کەرکووک، گۆڕستانێکیان لە نزیک گوندی تۆپزاوە دۆزیوەتەوە کە ڕووفاتی ئەنفالکراوانی تێدایە، داواش لە فەرمانگەی پاراستنی گۆڕە بەكۆمەڵەكان دەكەن، لەڕێگەی پزیشكی دادی كەركووكەوە لێكۆڵینەوە لە بەڵگە بەدەستهاتووەكان بكەن و لە دروستی ناسنامەی ئەو تەرمانە دڵنیاببنەوە كە لە سەردەمی بەعسدا و لەكاتی شاڵاوەكانی ئەنفال، لە سەربازگەی تۆپزاوە كوژراون یاخود لەژێر فشاری ئەشكەنجە و ئازاردا گیانیان سپاردووە.

 

لێدوانی فەرمی: هێمن حەسیب، چالاکوانی بواری جینۆساید و ئەنفال لە كۆنفرانسێكی ڕۆژنامەوانیدا ڕایگەیاند، "دوای بەدواداچوون و كاری بەردەوامی ساڵێك و شەش مانگ، بەڵگەی پێویستمان كۆكردووەتەوە كە ژمارەیەكی زۆر لەو گیراوە كوردانەی لەكاتی ڕژێمی بەعس لە سەربازگەی تۆپزاوە هێڵدراونەتەوە، لەژێر فشاری ئەشكەنجەدان و ئازاری زۆردا، گیانیان سپاردووە و بەشێوەی گۆڕی تاك لەلایەن شارەوانیی ئەوسای كەركووك لە گۆڕستانێكی نزیك گوندی تۆپزاوە نێژراون".

 

زانیاریی زیاتر: هێمن حەسیب ڕاشیگەیاندووە، "داوا لە فەرمانگەی پاراستنی گۆڕە بەكۆمەڵەكان دەکەین لەڕێگەی پزیشكی دادی كەركووكەوە، لێكۆڵینەوە لە بەڵگە بەدەستهاتووەكان بكەن و ڕووفاتی قوربانییان جیابكرێنەوە، بەو پێیەی هەڵدانەوەی گۆڕە بەكۆمەڵەكان تەنیا لە دەسەڵاتی فەرمانگەی پاراستنی گۆڕە بەكۆمەڵەكاندایە".

 

باكگراوند: شاڵاوەکانی ئەنفال کە لەلایەن ڕژێمی پێشوی بەعس دژ بە گەلی کورد لە هەشت قۆناغدا جێبەجێکرا، دوای تێپەڕبوونی 37 ساڵ بەسەر تاوانەکەدا و دۆزینەوەی تەرمی هەزاران قوربانی، هێشتا دەیان گۆڕی بەكۆمەڵ كە ڕووفاتی هەزاران قوربانیانی تێدایە، نەدۆزراونەتەوە و ئاشكرا نەكراون.