هەولێر 102 ساڵە پارێزگایە

ئاڤا نیوز

102 ساڵ لەمەوبەر و لە ڕۆژێكی وەك ئەمڕۆدا، بەدیاریكراوی لە 12-4-1923، بڕیاری بەپارێزگابوونی هەولێر درا، بەم بۆنەیەوە پارێزگاری هەولێر پەیامێكی پیرۆزبایی بڵاودەكاتەوە.

وێنە گەورەكە: پاش دامەزراندنی دەوڵەتی نوێی عێراق لەساڵی 1921 و لكاندنی باشووری كوردستان بەو دەوڵەتەوە، هەولێر كرایە موتەسەریفییەت و دوای دووساڵ و بەدیاریكراوی لە 12-4-1923 بڕیاری بەپارێزگابوونی دەرچوو.

لێدوانی فەرمی: ئومێد خۆشناو، پارێزگاری هەولێر ڕایدەگەیەنێت، "بە بۆنەی 102 ساڵەی بەپارێزگابوونی هەولێر، قەڵای بەرز و پڕشکۆی پێکەوەژیان و یەکترقەبوڵکردنی ئاینی، پیرۆزبایی لە دانیشتوانی شارەکەمان بەتایبەتی و سەرجەم کوردستانییان بەگشتی دەکەین."

- ئومێد خۆشناو ئومێد دەخوازێت، هەولێر كە هەمیشە سیمبولی ئاوەدانی، ئارامی، سەرتۆپی بەرخودانی و پێشەنگی ئازادیخوازی و خۆڕاگری و بەرگری، سەرقافڵەی قوربانیدان و خەبات، هەڵگری ئاڵای بەیەکەوەژیان و تەبایی و برایەتی بووە، بە گەشاوەیی و جوانی و ئاوەدانی و ئارامی بمێنێتەوە کە ئەمڕۆ بووەتە ناوەندی هاوکێشە سیاسییەکان و بڕیاری یەکلاکەرەوە.