بەڕێوەبەری گشتی چاکسازی: پڕۆژەیاسای لێبوردنی گشتی ئامادەیە

ئاڤا نیوز

هەزاران زیندانی لە چاکسازییەکانی هەرێمی کوردستان چاوەڕێی پڕۆژە یاسای لێبوردنی گشتیین، بەڕێوەبەری گشتیی چاکسازی کۆمەڵایەتیش دەڵێت: لەگەڵ دەستپێکردنەوەی دانیشتنەکان دەنێردرێت بۆ پەرلەمان.

وێنە گەورەکە: ئەگەرچی پەرلەمانی کوردستان لە 2017ـەوە بە یاسای ژمارە 4 یاسای لێبوردنی گشتی دەرکردووە، بەڵام ئەو پڕۆژە یاسایەی ئامادەکراوە کۆمەڵێک گۆڕانکاری نوێی تێدایە و هەزاران کەس لێی سودمەند دەبن.

لێدوانی فەرمی: ئیحسان عەبدولڕەحمان بابان، بەڕێوەبەری گشتیی چاکسازی کۆمەڵایەتی بە ئاڤا میدیای ڕاگەیاند، لیژنەیەک لە ئەنجومەنی وەزیران پڕۆژەیاسای لێبوردنی گشتی ئامادە کردووە و جیاوازە لەگەڵ ئەوەی عێراق، چاوەڕوانین پەرلەمانی کوردستان دانیشتنەکانی دەستپێبکات بۆ ئەوەی دەنگی لەسەر بدرێت.

هاوکات ئەو بڕیاری لێخۆشبوونەی لە عێراق دەرچووە هەرێمی کوردستان ناگرێتەوە.

زانیاریی زیاتر: بەوتەی ئیحسان عەبدولڕەحمان، ئەم پڕۆژەیە بۆ ئەوەیە چاکسازییەکان چۆڵ ببن و ئەوانەشی لەماوەی چەند ساڵی ڕابردوو چاکساز بوونە چانسێکی دیکەیان پێ بدرێت. لەگەڵ ئەوەشدا بەهۆی ئەم پڕۆژە یاسایەوە پێشبینی دەکرێت، نزیکەی دوو هەزار زیندانی لێی سوودمەند بن.

باکگراوند: ڕۆژی 2025-01-21، پەرلەمانی عێراق یاسای لێبوردنی گشتیی دەرکرد و بە هۆیەوە سەدان کەس لێی سوومەند بوون.