یەكێتی ئەوروپا ستایشی ئەزموونی هەرێمی كوردستان دەكات بۆ پاراستنی مافەكانی مرۆڤ

ئاڤا نیوز

بەرپرسی نووسینگەی یەكێتی ئەوروپا لە هەرێمی كوردستان ستایشی ئەزموونی هەرێمی كوردستان دەكات، دووپاتیشی دەكاتەوە لە پشتگیریكردنی كوردستان بەردەوام دەبن لەپێناو پاراستنی مافەكانی مرۆڤ و بەرەوپێشچوونی زیاتر.

 
چیرۆكی سەرەكی: لەمیانی كۆبوونەوەی دیندار زێباری، ڕێکخەری ڕاسپاردە نێودەوڵەتییەکان لە حكومەتی هەرێمی كوردستان لەگەڵ ڕادوو بوتوم، بەرپرسی نووسینگەی یەکێتیی ئەوروپا لە هەولێر، باس لە گرنگیی هەماهەنگیی نووسینگەی ڕێکخەری ڕاسپاردە نێودەوڵەتییەکان لەگەڵ یەکێتیی ئەوروپا كرا بۆ زیاتر پاراستنی مافەكانی مرۆڤ.

 

ڕاگەیێنراوی فەرمی: بەپێی ڕاگەیێنراوی فەرمی نووسینگەی ڕێکخەری ڕاسپاردە نێودەوڵەتییەکان، لەو دیدارە باس لە جێبەجێكردنی پلانی حكومەتی هەرێمی كوردستان بۆ مافەكانی مرۆڤ كراوە، هاوكات تیشک خرایە سەر گرنگی پاراستنی ئەو ئاسایش و سەقامگیرییەی کە لە هەرێمی کوردستاندا هەیە، سەرەڕای ئالنگاری و پێشهاتە ناوچەییەکان کە نموونەیەکی خۆڕاگری و بەرەوپێشچوونە، بە تایبەتی لە بابەتی پاراستنی مافی پێکهاتەکان، ڕۆژنامەنووسان، ئازاديی ئایینی و ڕادەربڕین، کە بووه‌تە هۆی ڕەخساندنی ژینگەیەکی لەبار بۆ پێکەوەژیان لە هەرێمى كوردستان.

لەلایەكی دیكەوە: زێباری ئاماژەی بە گرنگی پاراستنی مافەکانی ئافرەتان لە هەرێمی کوردستان کرد، کە لەپێشینەی کارەکانی حکومەت بووە وەک هەوڵەکانی هۆشیاريی خێزانی و بەرەنگاربوونەوەی توندوتیژی، زیادکردنی ڕۆڵی ئافرەت لە دامودەزگا‌کانی حکومەت و دەسەڵاتی دادوەری و یاسادانان.

 

بەتەنیشت ئەم بابەتەوە: بەرپرسی نووسینگەی یەکێتیی ئەوروپا ڕایگەیاند، ئەزموونی هەرێمی کوردستان جێی پێزانین و دەستخۆشیيە و نووسینگەی یەکێتیی ئەوروپا لە هەرێمی کوردستان بەردەوام دەبێت لە پشتگیریکردن لە هەوڵەکانی پاراستنی مافەکانی مرۆڤ و بەرەوپێشچوونی هەرێمی کوردستان.