هەواڵگری عێراق داوایەک ئاراستەی هەسەدە دەکات

ئاڤا نیوز

 

سەرۆکی دەزگای هەواڵگری عێراق داوا لە هێزەکانی سووریای دیموکرات (هەسەدە) دەکات "بەخێرایی" هەموو دەستگیرکراوە عێراقییەکان ڕادەستی بەغدا بکاتەوە، جەختیش دەکاتەوە کە هەسەدە جووڵەی داعشی لە سووریا سنووردار کردووە.

 

وێنە گەورەکە: هەرچەندە هەشت ساڵە کۆتاییهاتنی داعش لە عێراق ڕاگەیێنراوە، بەڵام تائێستا مەترسی سەرهەڵدانەوەی ڕێکخراوەکە هەیە بەتایبەتیش کە شانە نوستووەکانی داعش ناوەناوە هێرش دەکەنە سەر هاووڵاتیان و ‌هێزە ئەمنییەکان.

 

لێدوانی فەرمی: عەبدولکەریم عەبدفازڵ، سەرۆکی دەزگای هەواڵگریی عێراق لە چاوپێکەوتنێکدا دەڵێت، هەسەدە لە سووریا ڕێگری لە جووڵەی داعش کردووە و وای کردووە ڕێکخراوەکە نائومێد ببێت، بەڵام لەگەڵ ئەوەشدا پێویستە هەسەدە بەرپرسیارێتی خۆی هەڵبگرێت و بەخێرایی هەموو دەستگیر کراوە عێراقییەکان کە ئێستای لەلای زیندانین، ڕادەستی حکومەتی عێراقییان بکاتەوە.

 

بەشێک لە پەیامی عەبدولکەریم عەبدفازڵ، سەرۆکی دەزگای هەواڵگری عێراق:-

 

- هۆشداریی دەدەین لەوەی داعش هێرش بکاتەسەر کەمپی هۆل و هەزاران تیرۆرست ئازاد بکرێن، چاوەڕێ دەکەین هەسەدە  بەخێرایی هەنگاو بنێت و زیندانیکراوە عێراقییەکان ڕادەستی بەغدا بکاتەوە.

 

- کوژرانی سەرکردە و فەرماندەکانی داعش لە ئاستی جیهاندا، بە هەوڵ و دزەکردنی دەزگای هەواڵگری عێراق بووە بۆ ناو ڕێکخستنەکانی ئەو ڕێکخراوە.

 

- هەڕەشەکانی داعش، حیزبی بەعس و ئەوانەی دژایەتی عێراق دەکەن لە ئاستی میدیاییدایە و لە ئاستی شەقام و کۆمەڵایەتیدا هیچ کاریگەرییەکیان نییە، لە ماوەی ڕابردووشدا 505 کەس بەتۆمەتی تیرۆر و 145 کەسی دیکەش بەتۆمەتی ئەندامیەتی حیزبی بەعس دەستگیرکراون.

 

- هەشت هەزار زانیاریی پێشوەختمان بە لایەنەکان داوە کە هۆکار بوون بۆ ڕێگریی لە کردەوەی تیرۆریستی، گواستنەوەی ماددەی هۆشبەر و هەراسانکردنی ئەلیکترۆنیی.