ڕاپۆرتێکی پەیمانگای جەنگی ئەمریکی لە عێراق، دەنگدانەوەی لێدەکەوێتەوە

ئاڤا نیوز

نوێترین راپۆرتیی پەیمانگای لێکۆڵینەوەی جەنگی ئەمریکی (ISW) باسی ئەوە دەکات، نووری مالیکی بەڵێنی بە ئیدارەی ئەمریکا داوە، لە بەرامبەر وەرگرتنەوەی پۆستی سەرۆکوەزیران، گرووپە چەکدارەکان هەڵبوەشێنێتەوە، لە بەرامبەردا نووسینگەی مالیکی هەواڵەکە بەچەواشەکاری ناو دەبات.

بڵاوکراوەی فەرمی: بەگوێرەی راپۆرتەکەی "پەیمانگای جەنگی ئەمریکی" کە پشتی بە سەرچاوەیەکی ئاگادار بەستووە، نووری مالیکی، سەرۆکی هاوپەیمانی دەوڵەتی یاسا، پەیامێکی ئاڕاستەی ئیدارەی ئەمریکا کردووە و تێیدا ئامادەیی خۆی نیشانداوە بۆ گرتنەبەری رێوشوێنی تووند و یەکلاکەرەوە، لەوانەش هەڵوەشاندنەوەی بەشێک لەو گرووپە چەکدارانەی لەلایەن ئێرانەوە پاڵپشتی دەکرێن، ئەگەر بێت و لە قۆناغی داهاتوودا پۆستی سەرۆکوەزیرانی عێراقی پێ بدرێتەوە .

زانیاریی زیاتر: پەیمانگاکە ئاماژەی بەوە کردووە، ئەم پێشنیازەی مالیکی لە کاتێکدایە کە ململانێکان لە نێوان هێزە شیعەکان بۆ بەدەستهێنانی پۆستی سەرۆکوەزیران تووندبووەتەوە و فشاری نێودەوڵەتی و هەرێمیش بۆ کەمکردنەوە و لاوازکردنی هەژموونی ئەو گرووپە چەکدارانەی کە لە دەرەوەی دامەزراوە سەربازییە فەرمییەکانن تادێت چڕدەبێتەوە، بەڵام نووسینگەی مالیکی ئەم ڕاپۆرتە ڕەتدەکاتەوە.

بۆچوونی لایەنی بەرامبەر: هیشام ڕوکابی، بەڕێوەبەری نووسینگەی ڕاگەیاندنی سەرۆکی هاوپەیمانی دەوڵەتی یاسا، بە تووندی ناوەڕۆکی ڕاپۆرتەکەی ڕەتکردەوە و لە پۆستێکدا لە تۆڕی کۆمەڵایەتی "ئێکس" (X) ڕایگەیاندووە: ئەم بانگەشانە دوورن لە ڕاستییەوە و هیچ بنەمایەکیان نییە و هەوڵێکە بۆ تێکەڵکردنی بابەتەکان و شێواندنی دۆخەکە.