گەڕەکێکی دیکەی هەولێر ئاوەدان دەکرێتەوە

ئاڤا نیوز

ئەمڕۆ لە شاری هەولێر، بە ئامادەبوونی ئومێد خۆشناو، بەردی بناغەی پرۆژەی کردنەوەی شەقامەکانی گەڕەکی تیمار و تێکەڵەڕێژکردنیان دانرا.

وێنە گەورەکە: ماوەی چەند ساڵێکە ناردنی بەشە بودجەی هەرێمی کوردستان لەلایەن حکومەتی عێراق، کێشەی بۆ دروست کراوە، بەڵام لەگەڵ ئەوەشدا جێبەجێکردنی خزمەتگوزاری و کاروانی ئاوەدانی هەرێمی کوردستان بەردەوامە، لەسەر داهاتی ناوخۆ چەندین پڕۆژەی خزمەتگوزاری و ستراتیژی لەسەرجەم سێکتەرەکان لە هەرێمی کوردستان جێبەجێ کراون.

لێدوانی فەرمی: ئومێد خۆشناو، پارێزگاری هەولێر، دوای دانانی بەردی بناغەی کردنەوە و تێکەڵەڕێژکردنی شەقامەکانی گەڕەکی تیمار، گوتی: ئەم پرۆژەیە لەسەر 15٪ـی بودجەی سەرۆکایەتیی شارەوانی هەولێر، بەشێوەی راستەوخۆ جێبەجی دەکرێت.

زانیاریی زیاتر: پرۆژەکە گوژمەی 198 ملیۆن و 550 هەزار دینار جێبەجێ دەکرێت، لە قۆناغی یەکەم پرۆژەکە بریتی دەبێت لە کردنەوەی شەقام و تێکەڵەڕێژی بۆ چوار شەقامی 15مەتری، شەقامێکی 30 مەتری بە درێژی دوو کیلۆمەتر، ڕووبەری پرۆژەکە 38 هەزار مەتر دووجایە.

بۆچی گرنگە: تیمار، گەڕەکێکی نوێی شاری هەولێر، بە جێبەجێکردنی ئەو پرۆژەیە هاتووچۆی هاونیشتمانیان ئاسانتر دەبێت و ئاسانکاری زیاتریش بۆ ئەو هاونیشتمانیانە دەکات کە لەو گەڕەکە زەوییان هەیە و دەیانەوێت خانووی لەسەر دروست بکەن.

هەنگاوی داهاتوو: پارێزگاری هەولێر، دووپاتی کردەوە، لە قۆناغەکانی داهاتوودا، بەپێی بارودۆخ و بودجەی بەردەوست، پرۆژە خزمەتگوزارییەکانی دیکە بۆ ئەم گەڕەکە جێبەجێ دەکەین، وەک دروستکردنی تۆڕەکانی ئاوەڕۆ و گەیاندنی تۆڕی ئاوی خواردنەوە، دواتریش دروستکردنی بنکەی تەندروستی و قوتابخانە.

بە تەنیشت ئەم بابەتەوە: ئومێد خۆشناو ئاماژەی بۆ ئەوەش کرد: بە بودجەی نزیکەی 15 ملیار دینار، خزمەتگوزاریی بۆ کەرتی هەشتی حەسارۆک جێبەجێ کراون، ئەمە وایکردووە خەڵک دەست بە دروستکردنی خانوو بکات و کەرتەکە بەرەو ئاوەدانکردنەوە دەچێت.