عێراق بانکێکی زانیاریی نیشتمانی بۆ چەک دادەمەزرێنێت

ئاڤا نیوز

عێراق بە فەرمی دامەزراندنی بانکێکی تایبەت بە داتای سەرجەم پارچە چەکی حکومیی و ئەو چەکانە کە دەستیان بەسەردا دەگیرێت ڕاگەیاند و وەزارەتی ناوخۆش دەڵێت: " لە ماوەی ئەمساڵدا دەستمان بەسەر هەزاران پارچە چەکدا گرتووەتەوە".

وێنە گەورەکە: لە ساڵی 2006 بەهۆی دۆخی ئەمنییەوە، دەسەڵات بە وەزارەتە مەدەنییەکان درابوو چەک بکڕن، بەڵام ئێستا لیژنەی نیشتمانی بە هەماهەنگی لەگەڵ ئەمینداریەتیی گشتیی ئەنجوومەنی وەزیران، ئەركی ڕێکخستنەوەی ئەم دۆسیەیەی گرتووەتە ئەستۆ و بەپێی داتاکانی وەزارەتی ناوخۆ، لە ماوەی ئەمساڵدا زیاتر لە 42 هەزار پارچە چەکی سووک و مامناوەند لەو وەزارەتانە وەربگرنەوە، هاوکات بەهەزاران پارچە چەکیش لە هاووڵاتییان بەرامبەر بڕێک پارە کڕدراوە، یان دەستی بەسەردا گیراوە.

لێدوانی فەرمی: لیوا مەنسوور عەلی سوڵتان، بڕیاردەری لیژنەی کۆکردنەوەی چەک لە دەستی دەوڵەت لە وەزارەتی ناوخۆی عێراق ڕایگەیاند: ئێستا وەزارەت خاوەنی بانکێکی زانیاریی نیشتمانییە کە داتای چەکەکانی حکوومەت و ئەو چەکانەش لەخۆدەگرێت کە بەشێوەیەکی خولیی دەستیان بەسەردا دەگیرێت.

زانیاریی زیاتر: لیوا مەنسوور ئاماژەی بەوەشکرد،  ئەم بانکە نیشتمانییە بەپێی پێوەرە نێودەوڵەتییەکان کار دەکات، بەتایبەت دوای ئەوەی عێراق بووە ئەندام لە ڕێکخراوی بەرەنگاربوونەوەی تاوان و ماددە هۆشبەرەکان .

ئەمەش بزانە: ئەو بەرپرسە ئەمنییە ڕوونیشکردەوە، بۆ یەکەمجارە عێراق ببێتە ئەندام لە بانکی نێودەوڵەتی بۆ ڕێکخستنی چەک، ئەمەش ڕێگە دەدات بەدواداچوون بۆ ئەو چەکانەی کە لە ناوخۆی وڵات یان لەدەرەوە دەدزرێن بکرێت.