ئەندامێکی لۆردانی بەریتانیا بۆ ئاڤا: بەریتانیا پشتیوانێكی سەرەكیی هەرێمی كوردستانە

ئاڤا نیوز

ئەندامێکی ئەنجوومەنی لۆردانی بەریتانیا تایبەت بە ئاڤا ڕایدەگەیەنێت، وڵاتەکەی پشتیوانێکی سەرەکیی هەرێمی کوردستانە و کاریش دەکات بۆ زیاتر بەرزکردنەوەی هاوکارییە دووقۆڵییەکان لە سێکتەرە جۆراوجۆرەکاندا.

 

چیرۆکی سەرەکی: شاندێکی بەریتانی کە پێکهاتوون لە ئەندامانی ئەنجوومەنی لۆردان و پەرلەمانی بەریتانیا و یەکێتيی ئەوروپا و وەزیری ناوخۆی حکومەتی سێبەری بەریتانیا و شارەوانيی لەندەن، سەردانی هەرێمی کوردستانیان کردووە و بەنیازن لەگەڵ سەرۆک بارزانی و بەرپرسانی باڵای هەرێمی کوردستان کۆ ببنەوە.

 

بابەتە ستراتیژییەکە: مەبەستی هاتنی شاندەکە بۆ پتەوکردنی پەیوەندییە دووقۆڵییەکانی هەرێمی کوردستان و بەریتانیایە بەتایبەت لەپرسی کۆچبەران و پەرەپێدانی هاوکاریی سیاسی و ئابووری و ڕووبەڕووبوونەوەی ئەو کەسانەی بازرگانی بەمرۆڤەوە دەکەن.

 

لێدوانی فەرمی: جۆن مان، ئەندامی ئەنجوومەنی لۆردانی بەریتانیا تایبەت بۆ ئاڤا قسەی کرد و ڕایگەیاند، بەریتانیا پشتیوانێکی سەرەکیی هەرێمی کوردستانە و پابەندە بە بەردەوامی ئەو پشتیوانییە و کاریش دەکات بۆ زیاتر بەرزکردنەوەی هاوکارییە دووقۆڵییەکان لە کەرتە سەرەکییەکان لەوانەش: حوکمڕانی، ئابووری، ئاسایش و ئاڵوگۆڕی کولتووری.

 

ئەوەی پێویستە بیزانیت: ساڵی ڕابردوو یاداشتنامەی لێکتێگەیشتن لەنێوان حکومەتی هەرێمی کوردستان و حکومەتی بەریتانیا واژۆ کرا بە ئامادەبوونی سەرۆکى حکومه‌تى هه‌رێمی کوردستان و نوێنەری بازرگانيی شا چارلس بۆ ڕۆژهەڵاتی ناوەراست، کە وەزارەته‌کانى ناوخۆ، کشتوکاڵ، تەندروستی و وەزارەتی بازرگانی هاوبەش و سوودمەندی سەرەکین لێى.