یەکێتیی ئەوروپا پاکێجێکی نوێی پاڵپشتی دارایی بۆ فەڵەستین ڕادەگەیێنێت

ئاڤا نیوز

وەزیرانی دەرەوەی یەکێتیی ئەوروپا لە لۆکسمبۆرگ بۆ یەکەم کۆبوونەوەی "دیالۆگی ئاست بەرز" لەنێوان هەردوولا چاویان بە محەممەد مستەفا، سەرۆکوەزیرانی فەڵەستین کەوت و پاکێجێکی نوێی پاڵپشتی دارایی سێ ساڵەیان بۆ فەڵەستینییەکان ڕاگەیاند کە بەهاکەی دەگاتە یەک ملیار و 600 ملیۆن یۆرۆ.

چیرۆکی سەرەکی: دوای بەردەوامی هێرشە ئاسمانیی و زەمینییەکانی ئیسرائیل بۆ سەر غەززە، یەکێتیی ئەوروپا بەڵێنی نوێی هاوکاری دارایی بە فەڵەستین دەدات.

لێدوانی فەرمی: کاجا کاڵاس، بەرپرسی سیاسەتی دەرەوەی یەکێتیی ئەوروپا وتی: پاڵپشتییەکانمان بۆ گەلی فەڵەستین زیاتر دەکەین، یەک ملیار و 600 ملیۆن یۆرۆ تا ساڵی 2027 یارمەتیدەر دەبێت بۆ سەقامگیرکردنی کەناری ڕۆژئاوا و غەززە، هەروەها ئیدانەی "گەمارۆی تەواوەتی یارمەتییەکان بۆ ناو غەززە" دەکەین و  پێداگرین لەسەر ئەوە کە  هیچ چارەسەرێکی سەربازیی بۆ ململانێکان نییە.

ئەوەی پێویستە بیزانیت: یەکێتیی ئەوروپا هەوڵدەدات دەسەڵاتی فەڵەستین بەرز بکاتەوە، لەکاتێکدا ئیسرائیل شەڕی خۆی لە غەززە دەستپێکردووەتەوە دوای ئەوەی ئاگربەست تاڕادەیەکی زۆر شەڕی بۆ ماوەی دوو مانگ وەستاند.