لێدوانی نوێی مەسرور بارزانی لەبارەی مووچەی فەرمانبەران

ئاڤا نیوز 

سەرۆکوەزیران مەسرور بارزانی لە دیداری سلێمانی ڕایگەیاند، زۆر ناخۆشە بابەتی مووچە ببێت بە هەواڵی مانگانە، لە وڵاتێکی وەکو عێراق بە هەرێمی کوردستانیشەوە، نەدەبوو ئەمە بابەت بێت.

 

وێنە گەورەکە: ئەمڕۆ چوارشەممە دیداری سلێمانی لە زانکۆی ئەمریکی-سلێمانی بە بەشداری سەرۆکی هەرێمی کوردستان و سەرۆکوەزیران و ژمارەی سیاسیی هەرێمی کوردستان و جیهان بەڕێوەچوو، تیایدا تیشک خرایە سەر پێکهێنانی کابینەی داهاتوو و گۆڕانکارییە هەنووکەییەکانی ناوچەکە و جیهان. 

لێدوانی فەرمی: مەسرور بارزانی لە دیداری سلێمانی، باسی کێشەی مووچەی کرد و رایگەیاند، "کێشە لە سیستم هەیە، عێراق خۆی ئابوورییەکی هەیە لەسەر پارەی کاش دروستکراوە، ئەو وڵاتانەی پارەی کاش بنەمای ئابوورییانە، ناتوانن بە ستاندارێکی نێودەوڵەتی پێشبکەون".

 

ئەوەشی خستەڕوو کە "پشتگیریی زۆری سیاسی لێ نەکرا بەتایبەت لەلایەن ئۆپۆزیسیۆنەوە، سەرووی 95٪ـی ئەو کەسانەی بەشدارن، لە پڕۆژەکە ڕازین، بۆیە، هیچ بیانوویێک نییە بۆ ئەوەی "هەژماری من" بەردەوام نەبێت، هیچ لایەنێکیش نابێت بۆی هەبێت ڕێگری لەم پرۆسەیە بکات. 

 

 لە لایەکی دیکەوە: لە بەشێکی قسەکانی دا مەسرور بارزانی، باسی لە پڕۆژەی ڕووناکی کرد و گوتی، "ئەویش بۆ مەرامی سیاسی پڕوپاگەندەی لەدژ کرا گوایە پارەی زیاتر وەردەگیرێت. 80٪ـی ئەو کەسانەی بەشدارن لە پڕۆژەکە، کەمتر لە جاران پارە دەدەن، ئەوانەی زیاتر پارە دەدەن، ئەو کەسانەن کە کارەبای زیاتر بەکاردەهێنن. 

 

لەبارەی پرسی ئاو، مەسرور بارزانی ئاماژەی بە پڕۆژەی فریاگوزاریی خێرا کرد و ڕایگەیاند: ئاو لە زێی گەورەوە دەهێنن بۆ هەولێر و "هیوادارم لە ماوەیەکی نزیکدا ئەویش تەواو بێت.