لە قەتەر سوودانی لەگەڵ ئەحمەد شەرع کۆبووەوە

ئاڤا نیوز

 

بە ئامادەبوونی میری قەتەر، سەرۆکوەزیرانی عێراق لە دەوحەی پایتەختی قەتەر لەگەڵ ئەحمەد شەرع کۆبووەوە .

 

وێنە گەورەکە: سەرچاوەیەکی نزیک لە حکومەتی عێراق ئاشکرای کرد، ئەمڕۆ 17-4-2025 محەممەد شیاع سوودانی، سەرۆکوەزیرانی عێراق بەسەردانێکی خێرا دەگاتە قەتەر لەگەڵ ئەحمەد شەرع، سەرۆککۆماری سووریا بۆ قۆناغی ڕاگوزەر کۆبووەوە.

 

ڕاگەیاندنی فەرمی: ئەو سەرچاوەی نزیک لە حکومەت ڕایگەیاندووە: لەمیانی دیدارەکەدا سوودانی ئاماژەی بەوە کردووە کە عێراق جەخت لەسەر گرنگی هەنگاوەکانی حکومەتی نوێی سووریا بۆ بەرەنگاربوونەوەی چەکدارانی داعش دەکاتەوە.

 

- هاوکات لەکۆبوونەوەکەدا سوودانی داوای لەشەرع کردووە پرۆسەیەکی سیاسی گشتگیر، پاراستنی پێکهاتەکان و ئاشتەوایی کۆمەڵایەتی و ئایینی و نەتەوەیی لە سووریا و پاراستنی پیرۆزییەکان و شوێنەکانی عیبادەت دەستەبەر بکرێت.

- هەر بەپێی ئەو سەرچاوەیە هەردوولا لەسەر پەرەسەندنی پەیوەندییەکان و دامەزراندنی میکانیزمی هاوکاری کە خزمەت بە بەرژەوەندییە هاوبەشەکانی هەردوو وڵات بۆ ئاسایش و سەقامگیری لە ناوچەکەدا ڕێککەوتوون.

 

زانیاریی بەدەستهاتوو: ئاڤا لە سەرچاوەیەکی تایبەت زانیویەتی، کۆبوونەوە سێ قۆڵییەکەی نێوان سوودانی و شەرع و میری قەتەر ئەمڕۆ نەبووە بەڵکوو دوو ڕۆژ بەر لە ئێستا بووە، بەڵام میدیا عێراقییەکان ئەمڕۆ بەفەرمی بڵاویانکردووەتەوە.