لەبارەی تای خوێنبەربوون لە هەرێمی کوردستان، وەزیری تەندروستی دڵنیایی بە هاووڵاتییان دەدات

ئاڤا نیوز

بەپێی داتاكانی ڕێكخراوی تەندروستیی جیهانی، لە سەرەتای ئەمساڵەوە تاوەكوو ئێستا 76 حاڵەتی گومانلێكراوی پەتای تای خوێنبەربوون لە عێراق تۆمار كراوە، وەزیری تەندروستی کوردستانیش دڵنیایی دەدات کە هیچ حاڵەتێک لە هەرێمی کوردستان تۆمار نەکراوە.

وێنە گەورەکە: تای خوێنبەربوون نەخۆشییەکی گوزراوەی ڤایرۆسییە و بەچەند ڕێگەیەک دەگوازرێتەوە بۆ مرۆڤ، نیشانەکانی بریتین لە بەرزبوونەوەی پلەی گەرمیی جەستە، سەرئێشە و خوێنبەربوونی ژێر پێست کە زۆرجار کەسی تووشبوو بەم ڤایرۆسە گیان لەدەستدەدات.

لێدوانی فەرمی: د.سامان بەرزنجی، وەزیری تەندروستیی هەرێمی كوردستان بە ئاڤا میدیای ڕاگەیاند: وەك هەمیشە هەرێمی كوردستان سەركەوتوو بووە لە كۆنتڕۆڵكردنی نەخۆشییە گواستراوەكان، بەڵام لە شاری كەركووك چەند حاڵەتێك تۆمار كراوە ئەویش بەهۆی بڵاوبوونەوەی پەتایەكە لە پارێزگاكانی دیکەی عێراق.

زانیاریی زیاتر: لە هەرێمی كوردستان هەموو ئامادەكارییەك بۆ ڕووبەڕووبوونەوەی كۆنتڕۆڵكردنی ڤایرۆسی تای خوێنبەربوون كراوە و تاوەكو ئێستا هیچ حاڵەتێك تۆمار نەكراوە و تەنانەت هیچ گومانلێكراوێكیش نییە، هەماهەنگیی تەواومان لەگەڵ وەزارەتی تەندروستیی عێراق و وەزارەتی كشتوكاڵی هەرێمی كوردستانیش هەیە بۆ جێبەجێكردنی ڕێككاری پێویست، لە ساڵانی ڕابردوو چەند حاڵەتێكی ڤایرۆسەكە لە هەرێمی كوردستان تۆماركرا، بەڵام خۆشبەختانە سەركەوتووبووین لە چارەسەركردن و زاڵبوون بەسەر ڤایرۆسەكە. ئەمە قسەی وەزیری تەندروستییە.

ئەوەی پێویستە بیزانیت: وەزارەتی تەندروستیی، ڕێنوێنیی ئەو كەسانە دەكات كە ئاژەڵ بەخێو دەكەن ئەگەر هەستیان بە حاڵەتێكی تووشبوون لەنێو ئاژەڵەكانیان كرد بە زووترین كات دامودەزگا پەیوەندیدارەكان ئاگادار بكەنەوە.