سەرووی 19 هەزار فەرمانبەری دیكە ناویان بۆ وەرگرتنی زەوی دەگەڕێتەوە

ئاڤا نیوز

 

ناوی سەرووی 19 هەزار فەرمانبەری دیكە بۆ وەرگرتنی زەوی ڕەزامەندی لەسەر دەدرێت كە زۆربەیان كارمەندی وەزارەتی ناوخۆن، ئەم هەفتەیەش ناوی 15 هەزار فەرمانبەری دیكەی وەزارەتەكانی دیكە دەگەڕێتەوە.

 

وێنە گەورەكە: بەفەرمانی سەرۆكوەزیران مەسرور بارزانی، لە مانگی ئاداری ساڵی ڕابردوو، بڕیاردرا بە دابەشكردنی زەوی بۆ ئەو فەرمانبەر و خانەنشینانەی كە تاكو ئێستا لەوەرگرتنی زەوی سوودمەند نەبوونە، هەر فەرمانبەرێك بەپێی سیستمی خاڵبەندی زەوی پێدەدرێت بە لەبەرچاوگرتنی ساڵانی خزمەت، باری خێزانی و ژمارەی منداڵ، شوێنی نیشتەجێبوون، ڕووبەری 200 مەتر دووجا زەوییش بە هەر سوودمەندبووێك دەدرێت.

 

لێدوانی فەرمی: سەربەست مەولوود، سەرپەرشتیاری تیمی وردبینیكردنی پێدانی زەوی بە فەرمانبەران لە وەزارەتی شارەوانی و گەشتوگوزاری هەرێمی كوردستان بە ئاڤای ڕاگەیاند، دوێنێ ڕەزامەندی سەرووی 19 هەزار فەرمانبەری دیكە بۆ پێدانی زەوی گەڕایەوە، كە بەر لە جەژن مامەڵەكانیان ڕەوانەی ئەنجوومەنی وەزیران كرابوو.

ڕوونیشی كردەوە، دوای گەڕانەوەی ناوەكانیان، سوودمەندبووان بەپێی شوێنی نیشتەجێبوونیان بۆ شارەوانییەكانی خۆیان ڕەوانە دەكەین و شارەوانییەكان ڕێكاری پێویست دەستپێدەكەن.

 

زانیاریی زیاتر: ئەوانەی ناویان گەڕاوەتەوە زۆربەیان فەرمانبەری وەزارەتی ناوخۆن، بەشێكیان خانەنشینانی سەربازی و شارستانین، هەر لەم هەفتەیە ناوی 15 هەزار فەرمانبەری دیكە دەگەڕێتەوە كە لە وەزارەتە جیا جیاكانن.