وەزیری دەرەوەی فەرەنسا گەیشتە هەولێر

ئاڤا نیوز

دوای سەردانیکردنی بۆ بەغدا و کۆبوونەوەی لەگەڵ کاربەدەستانی عێراق، ژان نۆئێل بارۆت، وەزیری دەرەوەی فەرەنسا گەیشتە هەولێر و لەلایەن بەرپرسی فەرمانگەی پەیوەندییەکانی دەرەوەی هەرێمی کوردستان پێشوازی لێ کرا.

ئەوەی پێویستە بیزانیت: وەزیری دەرەوەی فەرەنسا لە هەولێر چاوی بە کاردیناڵ ساکۆ، پاتریارکی عێراق دەکەوێ، دواتر لەگەڵ سەرۆکوەزیران مەسرور بارزانی کۆدەبێتەوە، پاش ئەوەش راستەوخۆ دەچێتە پیرمام و چاوی بە سەرۆک بارزانی دەکەوێ، دوا وێستگەی سەردانەکەشی لەگەڵ سەرۆکی هەرێمی کوردستان نێچیرڤان بارزانی دەبێت و کۆنگرەیەکی ڕۆژنامەوانی دەکەن. 

زانیاریی بەدەستهاتوو: بەپێی زانیارییەکانی ئاڤا، وەزیری دەرەوەی فەرەنسا لەگەڵ بەرپرسانی هەرێمی کوردستان گفتوگۆ لەسەر چەند پرسێک دەکات:

- سەردانی سەرۆک ماکرۆن بۆ عێراق و هەرێمی کوردستان لە ئایندەدا.

- ڕۆڵی حکومەت و سەرۆک بارزانی لە بەدیهێنانی ئاشتی لە تورکیا.

- هەناردەکردنەوەی نەوتی هەرێمی کوردستان و ئاشتی و پێکەوەژیان لە ناوچەکە.

ئەمەش بزانە: وەزیری دەرەوەی فەرەنسا هەر ئەمشەو دەگەڕێتەوە بۆ پاریس.