پرۆژەی هەژماری من لە سلێمانی فراوانتر و خێراتر دەکرێت

ئاڤا نیوز

دوای گفتوگۆ و لەیەک نزیکبوونەوەی زیاتری پارتی و یەکێتی، تیمەکانی هەژماری من لە سلێمانی و دەوروبەری زیاتر دەکرێن و پڕۆکەسەکە خێراتر و فروانتر دەکرێ.

وێنە گەورەکە: دوای گفتوگۆکانی پێکهێنانی حکومەت و لەیەک نزیکبوونەوەی زیاتری پارتی و یەکێتی کە لە دوایین کۆبوونەوەیاندا باسی پڕۆژەی هەژماری منیان کرد، تیمەکانی هەژماری من لە سلێمانی و دەوروبەری زیاتر کراون و پڕۆکەسەکە خێراتر و فروانتر کراوە.

ئەوەی پێویستە بیزانیت: لە کۆی زیاتر لە یەک ملیۆن فەرمانبەر و خانەنشین، 750 هەزار کەس خۆیان لە پڕۆژەی هەژماری من تۆمار کردووە و تەنیا 250 هەزار کەس ماون کە زۆربەیان لە سنووری پارێزگاکانی سلێمانی و هەڵەبجەن.

زیانە سەرەکییەکان: پێشتر لە وەزارەتی دارایی عێراقەوە هۆشداری ئەوە درابوو، ئەگەر تاوەکو کۆتایی ئەمساڵ سەرجەم مووچەخۆران نەبنە خاوەنی هەژماری بانکی، مووچەیان ڕادەگیرێت. هاوشێوەی ئەو مووچەخۆرانەی لە ڕابردوودا بە هۆی نەبوونی یو پی ئێنەوە گرفتیان بۆ دروست بوو و مووچەكانیان ڕاگیرا.

زانیاریی تایبەت: تیمی پڕۆژەی هەژماری من بە ئاڤایان گوت، ئێستا لە سنووری سلێمانی خواستێکی زۆر لەسەر پڕکردنەوەی هەژماری من هەیە، ڕۆژانە زیاتر لە 100 فۆرم لەلایەن تیمەكانەوە پڕدەكرێنەوە، ئەمە لە كاتێكدایە پێشتر تەنیا 10 فۆرم پڕدەكرانەوە. 

ئەمەش بزانە: لە داهاتوودا پڕۆژەکە زیاتریش خێرا و فراوان دەکرێ، بۆ ئەوەی مەترسی لەسەر بڕینی مووچەی هیچ فەرمانبەر و خانەنشین دروست نەبێت، تەنانەت تیمەکان ڕاسپێردراون هەرچییەکیان کردووە تا کۆتایی ئەمساڵ سەرجەم مووچەخۆران تۆمار بکەن.