دووسایدی هەولێر - كۆیە گەیشتە دێگەڵە

ئاڤا نیوز

پڕۆژەی ڕێگای دووسایدی هەولێر - كۆیە بەردەوامە و ئێستا گەیشتووەتە دێگەڵە. بەفەرمی داوا لە كۆمپانیای جێبەجێكار کراوە تیمی كاركردن و ئامێرەكانی زیاد بكات و خێراتر كار لە پڕۆژەكە بكرێت.

وێنە گەورەکە: پڕۆژەی دووسایدی هەولێر کۆیە مانگی نۆی ساڵی ڕابردوو، دوای چەندین ساڵ لە وەستانی، جارێکی دیکە لەلایەن سەرۆکوەزیران مەسرور بارزانی بەردی بناغەی دانرایەوە و بڕی 435 ملیار دیناری بۆ تەرخان کرا، بە تەواوبوونی ماوەی نێوان ئەو دوو شارە لە کاتژمێرێکەوە بۆ كەمتر لە نیو کاتژمێر كەم دەبێتەوە.

لێدوانی فەرمی: ئەندازيار  خەتاب قادر، بەڕێوەبەری ڕێگاوبانی هەولێر بە ئاڤا میدیای ڕاگەیاند، بەخێرایی كار لە پڕۆژەكە دەکرێت، بەڵام خواستی حكومەت لە خێرایی زیاترە و بەفەرمی داوامان لە كۆمپانیای جێبەجێكار كردووە  تیمەكانی كاركردن و ئامێرەكانیش زیاتر بكات، بەو ئامانجەی خێراتر لەوەی كە هەیە كار لە پڕۆژەكە بكرێت.

زانیاریی زیاتر: كاركردن لە ڕێگاکە گەیشتووەتە دێگەڵە و بە درێژایی 20 كیلۆمەتر لە جێبەجێکردندایە، هەرچەندە كاری زۆری دەوێت، بەڵام بڕین و پڕكردنەوەی بەرزی و نزمییەكانی ناوچەكە زۆر بە خێرایی كاری لەسەر دەكرێت.

هەنگاوی داهاتوو: ئێستا پرۆژەکە گەیشتووەتە قۆناغی دووەم، پردەكانی قۆناغی یەكەمیش دیزاینیان تەواو بووە و ئەویش دەچێتە باری جێبەجێكردن. هاوكات كارگەیەكی قیڕیش دەبرێتە شوێنی پڕۆژەكە بۆ ئەوەی لەكاتی پێویست و زوودا دەست بە قیرتاویش بكرێت.