فایلی خەڵک؛ ئاڤا بەدواداچوون بۆ هۆکاری دواکەوتنی مامەڵەی خانەنشینانی وەزارەتی ناوخۆ دەکات

ئاڤا نیوز

 

ئاڤا بەدواداچوون بۆ گرفتی بەشێک لە خانەنشینانی وەزارەتی ناوخۆ دەکات، کە لەساڵی 2024 خانەنشین بوونە و تاوەکو ئێستا تەنها شەش مووچەى بنەڕەتیی مۆڵەتی کۆکراوەیان پێدراوە و 12 مووچەکەی ئیکڕامیان وەرنەگرتووە، داواشیان کردووە لە یاسای خانەنشینی یەکگرتووی عێراق سوودمەندبن و مووچەکانیان بە هاوتاکراوی وەربگرن.

 

وێنە گەورەکە: نزیکەی سێ بۆ چوار هەزار خانەنشینی سەرجەم فەرمانگەکانی حکومەتی هەرێمی کوردستان، کە لەساڵی 2024 خانەنشین کراون، هێشتا مووچەی مانگەکانی حەوت، هەشت، نۆ، دە و یازدەی ساڵی ڕابردوویان وەرنەگرتووە، جگە لەوەش هیچ مووچەکی ئەمساڵیان وەرنەگرتووە، بەو پێیەی مامەڵەی خانەنشینیان تەواو نەکراوە.

لێدوانی فەرمی: پێشتر مەریەم عوسمان، بەڕێوەبەری گشتیی خانەنشینی هەرێمی کوردستان بە ئاڤای گوت، مووچەی هیچ خانەنشینێکی زیندووی وەزارەتی ناوخۆ لە 500 هەزار کەمتر نابێت، 100 هەزارەکەی بژێویش دەیانگرێتەوە.

زانیاریی بەدەستهاتوو: پەیوەست بەم بابەتە، ئاڤا زانیویەتی بەڕێوەبەرایەتیی گشتیی خانەنشینی نووسراوی بۆ وەزارەتی دارایی و ئابووری کردووە بۆ ئەوەی ناویان لە لیستی خانەنشینی دەربهێنن و مووچەی ئەو پێنج مانگەیان بۆ ببەسترێت، و ئەمساڵ 100% بۆیان خەرج دەکرێت و چارەنووسی مووچەی مانگی دوازدەشیان، حاڵیان هاوشێوەی حاڵی هەر فەرمانبەرێکی دیکە دەبێت کە هێشتا دیار نییە ئەم مووچەیە، چی بەسەردێت.

ئەوەی پێویستە بیزانیت: خانەنشینانی وەزارەتی ناوخۆ بەمەرجی هەبوونی 'یو پی ئێن' مووچەکانی ساڵی ڕابردوویان بۆ خەرج دەکرێت، بەو پێیەی بەشێک لەو خانەنشینانە بەهۆی ئەوەی یو پی ئێنیان نەبووە، مووچەی چوار مانگی ساڵی 2024ـیان ڕاگیراوە، تاکو ئێستاش نازاندرێت قەرەبوو دەکرێنەوە یاخود نا، چونکە بەپێی قسەی مەریەم عوسمان؛ دەبێت تەرخانی دارایی هەبێت.

- دوای بەستنی مووچەش بۆیان، لیستێکی جیاوازیان بۆ دەکرێت و 12 مووچەکەی ئیکرامییەیان بۆ خەرج دەکرێت لەلایەن بەغداوە.

لەلایەکی دیکەوە: سەبارەت بەوەی بۆچی مامەڵەی خانەنشینانی ساڵی 2024 تەواو نەکراوە، پرۆسەکە بەم شێوەیە:

هەر فەرمانبەرێک کە خانەنشین دەبێت، سەرەتا دۆسیەی خانەنشینی بۆ تەواو دەکرێت، ئینجا دۆسیەکە بە قۆناغ دەڕوات لە فەرمانگە بۆ وەزارەت ئینجا بۆ بەڕێوەبەرایەتی خانەنشینی سنوورەکەی، دواتر بۆ بەڕێوەبەرایەتیی گشتیی خانەنشینی هەرێمی کوردستان و لەوێشەوە بۆ بەغدا، ئەمەش کاتێکی زۆری دەوێت.

- بەشێک لە خانەنشینان دەبێت نزیکەی ساڵێک و زیاتر لە ساڵێک چاوەڕێ بکەن تا مووچەیان بۆ دەبەسترێت، بۆ خێراکردنی ئەو پرۆسەش، دەسەڵاتی ڕاییکردنی مامەڵەکان بۆ بەڕێوەبەرایەتیی خانەنشینی شارەکان شۆڕکراوەتەوە.