کاروان ستوونی: حاجیان ڤاکسین دەکەین و خولێکیش بۆ کۆمپانیاکانی حەج و عومرە دەکەینەوە

ئاڤا نیوز

 

پێنج هەزار و 190 کەس بۆ حەجی ئەمساڵ ناوی گەڕاوەتەوە، بۆ ڕێگریکردنیش لە نەخۆشییە گوازراوەکان، حاجیان ڤاکسین دەکرێن و خولێکی تایبەتیش بۆ کۆمپانیاکان دەکرێتەوە.

 

چیرۆکی سەرەکی: حەج و عومرەی هەرێمی کوردستان لەڕێگەی وەزارەتی تەندروستییەوە دەستیکردووە بە ڤاکسینکردنی ئەو کەسانەی فەریزەی حەج ئەنجام دەدەن، ڕێنمایی تایبەتیش بە حاجیان و کۆمپایاکانیش دەدرێت.

 

لێدوانی فەرمی: کاروان ستوونی، بەڕێوەبەری ڕاگەیاندنی حەج و عومرەی هەرێمی کوردستان بە ئاڤا میدیای ڕاگەیاند: حاجیان پێویستیان بە ڤاکسینکردن هەبووە و ئێمەش لەڕێگەی وەزارەتی تەندروستییەوە پشکنینی شیاندنمان بۆ حاجیان دەستپێکردووە.

 

زانیاریی زیاتر: لە بەشێکی دیکەی قسەکانیدا کاروان ستوونی گوتی، ڕۆژانە لە پارێزگا و ئیدارە سەربەخۆ و قەزاکانیش، ڤاکسینی ئەو کەسانە دەکرێت کە دەڕۆنە فەریزەی حەج. ڤاکسینەکان ڕێگر دەبن لە گواستنەوەی نەخۆشی و هەوکردنی مێشک و ئەنفلۆزا وەرزییەکان. ستوونی دەشڵێت، ڤاکسینەکان بۆ هەموو تەمەنەکانە و هەنگاوێکی خۆپارێزییە.

لەلایەکی دیکە: هەرچی پەیوەستە بە سعودیەوە، بەگوتەی کاروانی ستوونی، ڕێکاری تووندی تەندروستیی گرتووەتەبەر. هەرێمی کوردستانیش لایخۆیەوە هەموو ڕێنماییەکی پێویستیان بە حاجیان داوە.

 

پێدراوە ڕاستییەکان: پێنج هەزار و 190 کەس ناویان بۆ حەج گەڕاوەتەوە؛ هاوکات ئەوانەی تەمەنیان لە سەرووی 70 ساڵیەوەیە لە %7 یان دەتوانن بچنە حەج. 

 

ئەوەی پێویستە بیزانیت: خولێکی تایبەت بۆ  ئەو کۆمپانیایانە کراوەتەوە کە هاووڵاتیان دەبەنە حەج و عومرە، لە خولەکەدا ڕێنماییە کارگێڕی و تەندروستییەکانیان پێدەدرێت، کارمەندەکانیان فێر دەکرێن فریاگوزاریی سەرەتایی بۆ هەر ڕووداویکی نەخوازراو بکەن، لە کاتێکدا کە تیمی تەندروستی لە شوێنەکە ئامادە نەبن.