فایلی خەڵک؛ گوندێک لە باڵەکایەتی 20 ساڵە بێ کارەبای نیشتمانییە

ئاڤا نیوز

گوندێکی دۆڵی باڵەییان سەر بە ئیدارەی سەربەخۆی سۆران ماوەی 20 ساڵە کارەبای نیشتمانییان نییە و تا ئێستا بۆیان دابین نەکراوە.

چیرۆکی سەرەکی: دانیشتووانی گوندی زەنگەڵین لە دۆڵی باڵەییان، زیاد لە 20 ساڵە کارەبای نیشتمانییان نییە و داوا لە وەزارەتی کارەبا، لایەنی بەرپرسی ناوچەکە دەکەن، کارەبای نیشتمانییان بۆ ڕابکێشن، کەچی کەس وەڵاممان ناداتەوە.

لێدوانی فەرمی: خەڵکی گوندەکە بە ئاڤا میدیایان وت، تەنانەت لە ساڵی 2021، کاتێک سۆران بوو بە ئیدارەی سەربەخۆ، دیسان داواکاریمان پێشکەش کردەوە، بەڵام دیسان کەس نەهات بە دەنگمانەوە. 15 گوندی ئەو ناوچەیە کارەبای نیشتمانی و ڕێگاوبان و تۆڕی ئاویان بۆ ڕۆیشتووە، بەڵام ئەوەی هیچی بۆ نەکراوە تەنیا گوندەکەی ئێمەیە.

بۆچوونی لایەنی بەرامبەر: ئەردەوان ئیبراهیم، بەڕێوەبەری گشتی کارەبای سۆران بە ئاڤا میدیای وت: هیچ کەسێک لەمەوبەر بۆ داواکاریەکی لەمجۆرە سەردانی ئێمەی نەکردووە، داوا لە نوێنەری ئەو گوندە دەکەم سەردانم بکەن، کەشفی ڕاکێشانی کارەبایان بۆ دەکەین و لە کارەبایان بۆ دابین دەکەین.